Հայաստանի Հանրապետութեան վերանկախացման 24-ամեակը Շահինշահրում գեղեցիկ տօնախմբութեամբ նշւեց հինգշաբթի, թւականիս սեպ. 24-ի երեկոյեան, համայնքի «Սրբոց Վարդանանց» դպրոցի շրջափակում, ներկայութեամբ Սպահանի հայոց թեմի թեմակալ առաջնորդ գերշ. Տ. Բաբգէն արք. Չարեանի, համայնքի հոգեւոր հովիւ հոգշ. Տ. Անանիա վրդ. Գուճանեանի, Թեմի Պատգամաւորական ժողովի դիւանի, Թեմական խորհրդի, համայնքի Վարչութեան եւ հոծ թւով ժողովրդի։
Հայաստանի Հանրապետութեան հիմնը յոտնկայս ունկնդրելուց յետոյ, Հ.Հ. Վերանկախացման 24-ամեակի տօնախմբութեան Շահինշահրի յանձնախմբի անունից հանդէս եկաւ օրդ. Անայիս Դաւթեանը՝ օրւան պատշաճ խօսքերով։
Այնուհետեւ բանախօսութեամբ ելոյթ ունեցաւ ազգային վաստակաւոր գործիչ պրն. Վրէժ Շիրւանեանը, որն օրւայ առիթով իր շնորհաւորման խօսքն ուղղելով բոլոր ներկաներին՝ նախ հպանցիկ ակնարկ նետեց հայ ժողովրդի վերջին 100 տարւայ պատմութեան վրայ, ապա անցաւ օրւայ նիւթին։ Նա անդրադառնալով Վերանկախացման 24 տարիների ընթացքում արձանագրւած բազմաթիւ նւաճումներին, նշեց նաեւ մի շարք կորուստներ, որոնցից ամենացաւալին Հայաստանից աւելի քան մէկ միլիոն հայերի հեռանալու իրողութիւնն է։ Նա իր խօսքում յիշատակեց. «Երբ հայերը հեռանում են հայրենիքից, դա նշանակում է, որ ինչ որ բան սխալ է, ինչ որ բան այնպէս չի արւում։ Այսօր էլ Հայաստանի պետականութեան ամենալուրջ մարտահրաւէրը հէնց արտագաղթն է»։ Ապա իր խօսքը շարունակելով ընդգծեց. «Այսօր Հայաստանի բնակչութեան շուրջ 40 տոկոսը աղքատ է։ Անկախութեան հանդէպ վերապահումների պատճառը ոչ միայն եւ ոչ այնքան աղքատութիւնն է, որքան այն յոռի բարքերը, որոնք եկան անկախութեան հէնց առաջին օրերից եւ դարձան շարքային հայ քաղաքացու ու կեանքի ու կենցաղի անքակտելի մասը։ Դա ե'ւ կոռուպցիան ու կաշառակերութիւնն է, ե'ւ մարդու իրաւունքների համատարած ոտնահարումը, ե'ւ պարբերաբար կեղծւող ընտրութիւններրը, անարդարութիւնը եւ սոցիալական խիստ շերտաւորումը»։ Մեծարգոյ բանախօսը եզրափակեց իր ելոյթը հետեւեալ տողերով. «Միայն կառավարման համակարգի փոփոխութեամբ է, որ հնարաւոր է վստահութիւն ներշնչել մեր անկախութեան հանդէպ եւ դեռ աւելին՝ լուծել ազգային գերխնդիրները։ Բայց պէտք է գիտակցենք, որ ի վերուստ ոչինչ տրւած չէ, ուստի մենք մեր ապագան պէտք է կերտենք Հայաստանով, Արցախով, Ջաւախքով, սփիւռքով միասնաբար, մի խօսքով՝ ազգովին»։
Բանախօսութիւնից յետոյ ներկաներին իր օրհնանքը տւեց գերշ. Սրբազան Հայրը, որը գնահատելով բովանդակալից բանախօսական ելոյթը շնորհաւորեց Հայաստանի Հանրապետութեան վերանկախացման 24-ամեակը եւ նշեց. «Հայաստանի բոլոր իշխանութիւնները եւ ղեկավարութիւնը պէտք է մտածեն ժողովրդի մասին, ժողովրդի հետ լինեն ու ժողովրդի համար լինեն, որպէսզի կարողանան պետութիւնը օր ըստ օրէ առաւել հզօրացնեն, Հայաստան աշխարհը աւելի պայծառացնեն։ Հայաստանը եւ հայերը ի սփիւռս աշխարհի մէկ պէտք է դառնան, մէկ բռունցք՝ միասնաբար դիմագրաւելու բոլոր տեսակի թշւառութիւնները, յաղթահարելու բոլոր տեսակի մարտահրաւէրները եւ ապրելու ազատ, անկախ Հայաստան աշխարհի մէջ, Արցախի մէջ, Ջաւախքի մէջ եւ սփիւռքի մէջ։ Սփիւռքի մէջ պէտք է մեր բոլոր ջանքերն ի սպաս դնենք Հայաստանի հզօրացման համար։ Այս գիտակցութեամբ մեր յաղթական երթը պիտի շարունակենք։ Թող Աստւած օրհնէ մեր հայրենիքը, մեր հողը եւ մեր ժողովուրդը, որպէսզի մենք միասնաբար՝ հայրենիք, ազգ եւ եկեղեցի, կարողանանք ապրել, գոյատեւել եւ մեր պայքարը շարունակել։ Շնորհաւորում եմ մեզ բոլորիս։ Կեցցէ՛, կեցցէ՛, կեցցէ՛ Հայաստանը»։
Տօնախմբութեան պաշտօնական բաժնից յետոյ, Նոր Ջուղայից հրաւիրւած «Անի» ստրադային նւագախմբի միջոցով կատարւեցին ազգային-հայրենասիրական եւ ժողովրդական երգեր, որոնք առաւել ոգեշնչեցին ներկաներին՝ բարձրացնելով նրանց տօնական տրամադրութիւնը։
Ծրագրի աւարտին օրւայ հանդիսավարը յանձնախմբի անունից շնորհակալութիւն յայտնեց Շահինշահրի Հայ կանանց եկեղեցասիրաց միութեանը, օրդ. Աւենիա Տէր Մինասեանին՝ իրենց ցուցաբերած համագործակցութեան եւ բոլոր ներկաներին իրենց խանդավառ ներկայութեան համար։
