«Մանուկ եւ տեւական խաղաղութիւն» հաստատութեան նախաձեռնութեամբ եւ Թեմիս Թեմական Խորհրդի համագործակցութեամբ «Մանուկ, խաղաղութիւն եւ միասնութիւն» կարգախօսով մանկա-պատանեկան միջազգային փառատօնի բացումը տեղի ունեցաւ երեքշաբթի՝ 2015 թւականի օգոստոսի 18-ի առաւօտեան ժամը 9:30-ին, Նոր Ջուղայի Հայոց ազգային կրթահամալիրի «Ալենուշ Տէրեան» սրահում:
Հայաստանից եւ Իրանի Ահւազ, Շահինշահր եւ Սպահան քաղաքներից հրաւիրւած միաստւածեան կրօններին դաւանող աւելի քան հարիւր երեխաների եւ պատանիների մասնակցութեամբ տեղի ունեցած բացման արարողութեանը ներկայ էին Սպահան քաղաքի ընդհանուր քաղաքապետ դկտ. Մեհդի Ջամալինեժադը, Մշակոյթի եւ իսլամական առաջնորդութեան գերատեսչութեան գլխաւոր տնօրէն հոջ. դկտ. Առզանին, Ազգային առաջնորդարանի պատասխանատուները, միաստւածեան կրօնների ղեկավարներն ու ներկայացուցիչները եւ պետական հրաւիրեալներ:
Ծրագիրն սկիզբ առաւ աղօթքով, որին յաջորդեց Իրանի Իսլամական Հանրապետութեան պետական դրօշի ծածանումն ու հիմնի հնչումը:
Ծրագրի ընթացքում դասախօսութիւններով հանդէս եկան քաղաքապետ դկտ. Մեհդի Ջամալինեժադը եւ դկտ. Առզանին, ովքեր շեշտեցին մանուկ-պատանիների դերն ու արժէքը՝ երաշխաւորւած, կայուն, ինչպէս նաեւ խաղաղ գոյակցութեան եւ փոխ-գործակցութեան հիման վրայ ապագայ կերտելու ուղղութեամբ, միաժամանակ մարդկային հասարկութեան այս նուրբ ու խոցելի խաւի առողջ աճն ու զարգացումը համարեցին ծնողների, դաստիարակների եւ պատասխանատուների կարեւորագոյն պարտականութիւններից մէկը:
Յաջորդիւ միաստւածեան կրօնների պատանի ներկայացուցիչների կողմից իրենց մայրենի լեզւով ընթերցւեցին եւ թարգմանւեցին իւրաքանչիւր կրօնի Սուրբ Գրքից հատւածներ՝ խաղաղութեան, համակեցութեան եւ գեղեցիկ աշխարհ կառուցելու կապակցութեամբ:
Ելոյթների շարքն աւարտւեց Սպահանի հայոց թեմի թեմակալ առաջնորդ գերշ. Տ. Բաբգէն արք. Չարեանի պատգամով, որն ընթերցեց Թեմական խորհրդի ատենապետ պրն. Վրէժ Տէր Մարտիրոսեանը: Թեմակալ առաջնորդն իր ուղերձում շեշտելով նոր սերնդի առողջ դաստիարակութեան կարեւորութիւնը, կոչ էր ուղղել բոլորին գուրգուրել մանուկներին ու պաշտպանել նրանց իրաւունքները: Գերշ. Սրբազան Հայրը խօսելով խաղաղութեան մասին, ընդգծել էր, որ Իրանը մշտապէս եղել է խաղաղութեան կողմնակից ու պատշպան, եւ որ այդ կեցւածքը պէտք է օրինակ ծառայի ամբողջ աշխարհին:
Փառատօնի բացման արարողութիւնն ուղեկցւեց դպրոցի բակում խաղաղութեան աղաւնիներ թռցնելով, որից յետոյ տեղի ունեցաւ հիւրասիրութիւն:
Հիւրասիրութիւնից անմիջապէս յետոյ, Հայոց դպրոցի սրահում եւ դասարաններում սկսւեցին փառատօնի աշխատանքային բաժինները: Մասնակից մանուկ-պատանիները խմբերի բաժանւած, պատասխանատուների եւ ուղեցոյցների առաջնորդութեամբ սկսեցին եռօրեայ իրենց աշխատանքը՝ ստեղծելու մանուկ, խաղաղութիւն եւ միասնութիւն թեմաներով գործեր, որոնք փառատօնի աւարտին ներկայացւելու են հանրութեանը՝ ցուցահանդէսի միջոցով:
Փառատօնի ընթացքում մասնակիցները զբաղւելու են նկարչութեամբ, դիմակի պատրաստմամբ, ժողովրդական-տեղական խաղերով, քոլաժով, պատմասացութեամբ, թատրոնով, երգով, գրքերի պատրաստմամբ եւ արւեստի այլ տեսակներով:
Փառատօնը տեւելու է մինչեւ օգոստոսի 20-ը, որի հիմնական շեշտը դրւած է՝ միաստաւծեան կրօնների հետեւորդների եւ տարբեր ազգերի միջեւ խաղաղ գոյակցութեան եւ մշակութային յարաբերութիւնների զարգացման, մարդու իրաւունքների կապակցութեամբ Իրանում ընթացող գործունէութիւնը ներկայացնելու եւ Իրանը որպէս խաղաղութեան պաշտպան երկիր ծանուցանելու վրայ:
