Նոր Ջուղայի հայոց ազգային «Քանանեան» աղջկանց եւ «Կատարինեան» տղայոց միջնակարգ դպրոցների տեսչութիւնների համատեղ նախաձեռնութեամբ եւ Սպահանի հայոց թեմի Կրթական խորհրդի հովանաւորութեամբ, այս ամառ եւս տեղի ունեցաւ երրորդ միջնակարգի եւ նախահամալսարանական օղակի թւով 19 գերազանցիկ աշակերտ-ուհիների գնահատանքի ճամբարը՝ դէպի Թեհրան, որի մեկնումը իրականացւեց երկուշաբթի, յունիսի 29–ի երեկոյեան: Սա երկրորդ տարին է, որ Նոր Ջուղայի գերազանցիկ աշակերտների ճամբարը տեղի է ունենում Թեհրանում:

Աշակերտական խմբին ուղեկցող պատասխանատուներին գլխաւորում էին զոյգ դպրոցների փոխ-տեսուչներ Ռիմա Սիմոնեանն ու Ռուբէն Գրիգորեանը:

Եռօրեայ այս ճամբարի ընթացքում տեսարժան վայրեր այցելելու եւ յատկապէս քաղաքի հայ համայնքի ու ազգային հաստատութիւնների հետ առաւել ծանօթանալու նպատակով կազմակերպւել էին մի շարք այցելութիւններ, որոնք ոչ միայն հետաքրքիր էին մասնակիցների համար, այլեւ որպէս դաստիարակչական աշխատանք մեծ ազդեցութիւն ունեցան նրանց վրայ: 

Մշակւած ծրագրի համաձայն՝ գերազանցիկներն այցելեցին «Նիաւառան» պալատ-թանգարան եւ մօտիկից ծանօթացան իրանական մշակոյթի այս հատւածին ու պատմութեանը: Աշակերտները յաճախեցին նաեւ «Ալիք» հաստատութիւն, որտեղ նրանց ջերմ դիմաւորեցին հաստատութեան տնօրինութիւնը, «Ալիք» օրաթերթի խմբագրական կազմն ու աշխատողները՝ աշակերտների մօտ հարազատ տան մէջ գտնւելու զգացում առաջացնելով: Պատանի այցելուներին հետքրքրեց յատկապէս օրաթերթի տպագրման համար տարւող աշխատանքը եւ մտաւորական խաւի հետ շփումը: «Ալիք» հաստատութիւնում եղած ժամանակ հանդիպում կայացաւ նաեւ իրանահայ անւանի բանաստեղծ Վարանդի հետ, ով խօսեց հայ պոէզիայի ու իր ստեղծագործական կեանքի մասին եւ սպառիչ պատասխաններ տւեց աշակերտների հարցերին:

Կեանքի դպրոց կարելի է համարել «Յակոբեան» հագուստի արդիւնաբերութեան միաւոր կատարած այցելութիւնը, որտեղ աշակերտները հանդիպելով իրանահայ յաջողակ գործարար Սմբատ Յակոբեանին, շատ հետաքրքիր եւ ուսուցողական զրոյց ունեցան նրա հետ: Տպաւորիչ էր յատկապէս այն փաստը, որ պրն. Յակոբեանն իր աշխատանքում առաջադիմել եւ համբաւ է ձեռք բերել՝ իր նպատակասլացութեան, կուռ կամքի, կարգապահութեան ու աշխատասիրութեան շնորհիւ:

Ճամբարի մասնակիցները յաճախեցին «Դելֆինարիում» եւ «Աբ վա աթաշ» նորաոճ խաղերի զբօսայգի, ինչու չէ նաեւ «Միլադ» աշխարհահռչակ աշտարակ, որտեղ ծանօթացան սոյն կոթողի ճարտարապետական յատկութիւններին եւ հմայւեցին քաղաքի երեկոյեան հիասքանչ տեսարանով:

Խումբը Նոր Ջուղա վերադարձաւ յուլիսի 2-ին, մեծ հետաքրքրութեամբ ընկալելով ուղեւորութեան ընթացքում իրենց հրամցւած տեղեկութիւնները եւ բաւականութիւն ստանալով կազմակերպւած բոլոր ծրագրերից: Խորապէս համոզւած ենք, որ այս ճամբարի գեղեցիկ յուշերը դեռ երկար տարիներ թարմ է մնալու նրանց յիշողութիւններում: 

Թեհրան եղած ժամանակահատւածում աշակերտները կեցութիւն էին հաստատել Հ.Մ.Ա.Կ.-ում, ինչի համար իրենց շնորհակալութիւն են յայտնում այս հաստատութեան պատասխանատուներին: Խորին շնորհակալութիւն են յայտնում յատկապէս «Ալիք» հաստատութեան տնօրինութեանն ու անձնակազմին եւ «Յակոբեան» ընկերութեան սեփականատէրերին՝ համագործակցութեան եւ գրկաբաց ընդունելութեան համար: