Մեր Տիրոջ՝ Յիսուս Քրիստոսի Այլակերպութեան տօնի (Վարդավառ) առթիւ կիրակի՝ յուլիսի 12-ի առաւօտեան, Փերիոյ գաւառի հայաբնակ Բոլորան գիւղի Ս. Ղուկաս եկեղեցում, նախագահութեամբ Սպահանի հայոց թեմի առաջնորդ գերշ. Տ. Բաբգէն արք. Չարեանի մատուցւեց Ս. եւ անմահ Պատարագ: Օրայ պատարագիչն էր արժն. Տ. Վարդան քհնյ. Աղաբաբայեանը, իսկ արարողութեանը մասնակցում էին Շահինշահրի հայ համայնքի հոգեւոր տեսուչ հոգշ. Տ. Անանիա վրդ. Գուճանեանը, արժն. Տ. Խաչատուր քհնյ. Զարգարեանը եւ դպրաց դասը: Երգեցողութիւնը կատարւեց Ս. Ամենափրկչեան վանքի «Կոմիտաս» երգչախմբի միջոցով՝ ընկերակցութեամբ Ս. Ամենափրկչեան վանքի «Տաթեւ» երգչախմբի անդամների: 

Եկեղեցում ներկայ էին Բոլորան գիւղի հայ համայնքի անդամներն ու Վարդավառի տօնը նշելու նպատակով գիւղում կեցութիւն հաստատած Նոր Ջուղայից, Շահինշահրից, Թեհրանից եւ այլ շրջաններից ժամանած հայորդիներ: 

Յընթացս Ս. Պատարագի թեմակալ առաջնորդ Սրբազան Հայրն օրւան պատշաճ իր հայրական պատգամը փոխանցեց հաւատաւոր ժողովրդին: Նա անդրադառանլով Թափոր լեռան վրայ Քրիստոսի պայծառակերպութեանը եւ այլակերպութեան պահին երկնքից լսւած Աստծու վկայութեանը՝ «Սա է իմ սիրելի Որդին, Նրան լսեցէք», աւելացրեց. «Քրիստոսը Թափոր լեռան վրայ, Իր աշակերտների դիմաց, Իր աստւածային փառքով եւ տեսիլքով այլակերպւեց ու պայծառակերպւեց, որպէսզի աշակերտները եւ նրանց միջոցով ամբողջ մարդկութիւնը ճանաչի ու տեսնի, որ Քրիստոսը եկել է մարդու համար, մարդու հետ լինելու եւ մարդուն դէպի փրկութիւն առաջնորդելու»:

Սրբազան Հայրն իր քարոզի երկրորդ բաժնում նշելով, որ Այլակերպութեան տօնի պատգամը Աստծու հետ զօրանալը, մենութեան մէջ Աստծու հետ խօսելը, աղօթելն ու սրբանալն է, ներկաներին յորդորեց տօնի աւանդական սովորութիւնները, յատկապէս միմեանց վրայ ջուր ցանելու սովորութիւնը, ծայրայեղութեան չտանել եւ տօնն իր իմաստից չպարպել: Նա պատգամեց նաեւ՝ տօնի խորհրդով փոխւել, այլակերպւել, սրբւել ու մաքրւել՝ Քրիստոսի ներկայութիւնն զգալու եւ կեանքը քրիստոնեային վայել կերպով շարունակելու համար: 

Գերշ. Տ. Բաբգէն արք. Չարեանն իր խօսքի աւարտին շնորհակալութիւն յայտնելով Բոլորան գիւղի եկեղեցու նախկին վարչութեանը, ուժ ու կորով մաղթեց նորանշանակ կազմին՝ գիւղը եւ եկեղեցին պայծառ պահելու գործում:  

Եկեղեցական արարողութիւնից յետոյ առաջնորդ Սրբազան Հայրն այցելեց գիւղի շրջապատում վրանների մէջ օթեւան գտած ժողովրդին եւ մասնակից լինելով նրանց ուրախութեանը, փոխանցեց իր օրհնութիւնը:  

Այլակերպութեան տօնի առթիւ Ս. եւ անմահ Պատարագ մատուցւեց նաեւ Նոր Ջուղայի Ս. Յովհաննու եկեղեցում՝ ձեռամբ արժն. Տ. Վազգէն քհնյ. Քէօշկէրեանի եւ երգեցողութեամբ «Շուշանիկ» հոգեւոր երգչախմբին, որին ընկերակցում էին նաեւ Ս.Ա. Վանքի «Կոմիտաս» երգչախմբի անդամներից: Արարողութեանը մասնակցում էին նաեւ արժն. Տ. Մեսրոպ աւ. քհնյ. Գալստանեանն ու դպրաց դասը: Պատարագիչ քահանան քարոզի պահին անդրադառնալով Այլակերպութեան դրւագին, շեշտեց աղօթքի կարեւորութիւնը, որի միջոցով մարդ այլափոխւելու եւ սրբակենցաղ ընթացք է որդեգրելու իր կեանքի ընթացքում։