Նախաձեռնութեամբ Ն.Ջ. Հայ Մ.Մ. «Արարատ» միութեան հիմնադրման 60-ամեակի Յոբելեանական յանձնախմբի, ուրբաթ՝ յունիսի 19-ի երեկոյեան, միութեան բացօթեայ տարածքում դաշտահանդէսի տեսքով կայացաւ տօնահանդէս, որով մեկնարկեց Ն.Ջ. Հայ Մ.Մ. «Արարատ» միութեան 60-ամեակին նւիրւած միջոցառումների շարանը: Երեկոն, որին ներկայ էին Նոր Ջուղայի եւ Շահինշահրի հայ համայնքի անդամները, սկսւեց օրւայ հանդիսավարուհի Մանիա Ղուկասեանի ողջոյնի եւ բացման խօսքով, որից յետոյ հանդիսավարուհին տեղեկութիւններ փոխանցեց երեկոյի մասին, ապա ամփոփ կերպով անդրադարձաւ միութեան հիմնադրմանն ու գործունէութեանը:
Երեկոն խանդավառութեամբ ողողւեց համայնքի սիրւած երգիչ Մասիս Պարսամեանի եւ նրան ընկերակցող նւագախմբի անդամներ՝ Անդրէ Պարսամեանի, Սեպուհ Ղուկասեանի եւ Վահէ Յարութիւնեանի երգ-երաժշտութեամբ: Ընթացքում հոծ բազմութիւնը էկրանի վրայ ցուցադրւող լուսանկարների միջոցով հաղորդակից դարձաւ միութեան անցեալի հետ եւ ծանօթացաւ կատարւող աշխատանքներին: Միեւնոյն ժամանակ, վայելեց միութեան Երէցների, Մշակութային, Մարզական, Սկաուտական եւ Ուսանողական միաւորների ու Յանձնախմբի միջոցով պատրաստած ուտեստներն ու կազմակերպւած բազմաթիւ խաղերը, իսկ երեխանները վայելեցին նաեւ մանկական բաժնում տեղակայւած նոր խաղերը:
Նշելի է, որ Յոբելեանական յանձնախումբը բաղկացած է միութեան եւ Շահինշահրի մասնաճիւղի կենտրոնական եւ միաւորների վարչութիւնների ներկայացուցիչներից:
