2015 թւականի ապրիլի 3-ին, Աւագ ուրբաթի երեկոյեան ժամը 6:00-ին, Սպահանի հայոց թեմի բոլոր հոգեւորական հայրերը, թեմակալ առաջնորդ գերշ. Տ. Բաբգէն արք. Չարեանի գլխաւորութեամբ, Նոր Ջուղայի Ս. Յովհաննու եկեղեցում մեր Տիրոջ՝ Յիսուս Քրիստոսի Թաղման կարգը կատարեցին: Եկեղեցին առլեցուն էր հաւատացեալներով:
Եկեղեցում, դասի կենտրոնում, Ս. Խորանի առջեւ ծաղիկներով զարդարւած եւ Քրիստոսի գերեզմանը պատկերող սեղանի առջեւ հոգեւոր հայրերի, դպրաց դասի եւ պրն. Համիկ Ալեքսանդրեանի ղեկավարութեամբ՝ Ս. Ամենափրկչեան վանքի “Տաթեւ” երգչախմբի միջոցով երեկոյեան արարողութիւն կատարւեց, որը ողողւած էր աստւածաշնչեան ընթերցումներով, որոնք մեսիական չարչարանքներն ու զոհագործութիւնն էին ներկայացնում:
Արարողութեան ընթացքում հոգեւորականաց դասը Քրիստոսի խորհրդանշական գերեզմանի առջեւ, ծնկի իջած երգեց “Սուրբ Աստւած”-ը, իսկ վերջում, նոյն վիճակով՝ “Խաչի Քո Քրիստոս...” հոգեզմայլ շարականը:
Արարողութեան աւարտին գերշ. Տ. Բաբգէն արք. Չարեանը, բնաբան ունենալով “Երանի սգաւորներին, որովհետեւ նրանք պիտի մխիթարւեն” աւետարանական համարը, իր պատգամը փոխանցեց հաւատացեալ ներկաներին: Առաջնորդ Սրբազան Հայրը սոյն “Երանի”-ն վերագրեց այն անձանց, ովքեր իրենց եւ աշխարհի մեղքերի համար են ողբում ու “սուգ” պահում, որոնց մխիթարանքը մեծ է, որովհետեւ նրանք վերանորոգւած եւ սրբացած կեանք են դիմաւորելու՝ ճիշտ այնպէս, ինչպէս Յիսուս Քրիստոսը գերեզմանից վեր յառնելով նոր լոյս եւ կեանք սփռեց աշխարհին՝ մահւան վրայ յաղթանակ տանելով:
Արարողութիւնից յետոյ, խորհրդանշական գերեզմանի վրայ դրւած ծաղիկները բաժանւեցին հաւատացեալ ներկաներին, որը խորհրդանշում էր Քրիստոսի մեզ շնորհած նոր կեանքի անուշ բոյրն ու գեղեցկութիւնը:
