Շաբաթ՝ 2015 թւականի մարտի 28-ի կէսօրից յետոյ ժամը 5:30-ին, Սպահանի հայոց թեմի թեմակալ առաջնորդ գերշ. Տ. Բաբգէն արք. Չարեանի գլխաւորութեամբ, Պատգամաւորական ժողովի, Թեմական եւ Կրօնական խորհուրդների, Հաշւեքննիչ մարմնի ատենապետերից եւ անդամներից բաղկացած պատւիրակութիւնն այցելեց Սպահանի նահանգապետարան եւ հանդիպեց Սպահանի նահանգապետ Դոկտ. Ռասուլ Զառգառփուռին:
Առաջնորդ Սրբազան Հայրը նահանգապետին շնորհաւորեց Նոռուզի կապակցութեամբ եւ իր մտածումները փոխանցեց այդ ուղղութեամբ՝ կարեւորելով բնութեան վերազարթօնքի նմանութեամբ մարդու հոգու եւ մտքի վերանորոգումը: Գերշ. Տ. Բաբգէն արք. Չարեանը իր եւ հայ համայնքի անունից մեծ ուրախութիւն յայտնեց, որ նահանգապետի ջանքերի եւ հետեւողական աշխատանքի շնորհիւ Սպահանն առաւել ծաղկուն ու գեղեցիկ կերպով, յատկապէս Զայանդեռուդ գետի ջրառատ վիճակով, սկսել է իրանական նոր տարին եւ դիմաւորւել Նոռուզի հիւրերին ու այցելուներին: Առաջնորդ Սրբազան Հայրը յատուկ կերպով շնորհակալութիւն յայտնեց պրն. նահանգապետին, որ անցնող տարւայ ընթացքում ընդառաջելով զանազան առիթներով Ազգային առաջնորդարանի կողմից իրեն յղւած հրաւէրներին, իր ներկայութեամբ պատւել է բոլորին:
Թեմակալ առաջնորդն անդրադառնալով Հայոց ցեղասպանութեան 100-ամեակին, մատնանշեց այս տարւայ յատուկ նշանակութիւնն ու կարեւորութիւնը հայ ժողովրդի համար, միաժամանակ խօսելով այս կապակցութեամբ Հայաստանի հանրապետութեան կենտրոնական յանձնախմբի ծրագրած աշխատանքների մասին, Սպահանի հայոց թեմի համար մեծ պատիւ համարեց Երեւանում կայանալիք յիշատակի միջոցառումներին Դոկտ. Զառգառփուռի ներկայութիւնը, յայտնելով, որ սկզբունքային համաձայնութիւն տալու դէպքում, Առաջնորդարանը կատարելու է պարտն ու պատշաճը՝ Հ.Հ.-ի նախագահի կողմից նրա համար պաշտօնական հրաւէր ապահովելու ուղղութեամբ:
Սպահանի նահանգապետ Դոկտ. Ռասուլ Զառգառփուռն իր ուրախութիւնը յայտնելով այցելութեան կապակցութեամբ, ինքը եւս շնորհաւորանքներ փոխանցեց Նոռուզի, ինչպէս նաեւ առաջնորդ Սրբազան Հօր «Արքութեան» տիտղոսի ստացման առիթներով: Պրն. նահանգապետն անցնող տարւայ մեծ ձեռքբերումներից համարեց Ս. Ամենափրկչեան վանքի «Ս. Յովսէփ Արեմաթացի» եկեղեցու 350-ամեակի պատշաճ տօնակատարութիւնը, Ն.Ս.Օ.Տ.Տ. Արամ Ա Վեհափառ Հայրապետի հովւական եւ Հայաստանի հանրապետութեան վարչապետի աշխատանքային այցը Սպահան: Յիշեալն իր խօսքերի մէջ յատուկ կերպով շեշտեց, որ աշխարհը պէտք է իմանայ, որ ընդհանրապէս Իրանում եւ ի մասնաւորի Սպահանում միաստւածեան կրօնների հետեւորդները խաղաղ համագոյակցութեամբ եւ միասնական ջանքերով ստեղծել են օրինակելի մի միջավայր, որը յատկապէս գարնանային այս օրերին, առաւել հաճելի է դարձել այցելուների եւ զբօսաշրջիկների համար:
Բարեմաղթանքներ փոխանցելուց եւ հիւրասիրւելուց յետոյ պատւիրակութիւնը հրաժեշտ տւեց նահանգապետին:
