Սպահանի հայոց թեմի Թեմական խորհրդի յատուկ որոշումով կեանքի կոչւած յոբելեանական յանձնախումբը դեկտեմբերի 20-ի երեկոյեան ժամը 7:30-ին, Ն.Ջ. Հայ Մ.Մ. «Արարատ» միութեան սրահում կազմակերպել էր յոբելեանական հանդիսաւոր միջոցառում՝ նշելու Սպահանի հայոց թեմի թեմակալ առաջնորդ գերշ. Տ. Բաբգէն արքեպս. Չարեանի քահանայական ձեռնադրութեան եւ օծման 30-ամեակը եւ Սպահանի հայոց թեմի առաջնորդ ընտրւելու 10-ամեակը:

Ծրագրին ներկայ էին գերշ. Տ. Վարուժան արքեպս. Հերկէլեանը, Թեհրանի հայոց թեմի առաջնորդ գերշ. Տ. Սեպուհ արքեպս. Սարգսեանը, Թեհրանի առաջնորդական փոխանորդ գերշ. Տ. Մակար եպս. Աշգարեանը, Իրանի իսլամական հանրապետութիւնում Հայաստանի հանրապետութեան լիազօր դեսպան մեծարգոյ պրն. Գրիգոր Առաքելեանը, Սպահանի հայոց թեմի հոգեւորականաց դասը, ազգային մարմինների, շրջանի Հայ դատի յանձնախմբի, միութիւնների ու հայոց ազգային դպրոցների ներկայացուցիչները եւ սրահը ծայրէ ծայր լցրած նորջուղայեցի եւ շահինշահրցի հայորդիներ:

Հանդիսութիւնն սկիզբ առաւ Շահինշահրի հայ համայնքի հոգեւոր տեսուչ եւ յոբելեանական երեկոյի հանդիսավար հոգշ. Տ. Անանիա վրդ. Գուճանեանի արտասանած բացման խօսքով եւ թեմակալ առաջնորդին նւիրւած բանաստեղծութեան բառերով: Ապա Սարինէ Յարութիւնեանը նարեկեան աղօթքի բառերով մաղթեց առ բարձրեալն Աստւած արժանի կերպով սկսելու եւ աւարտին հասցնելու ծրագիրը:

Նարեկեան պահից յետոյ, ցուցադրւեց թեմակալ առաջնորդի կենսագրականի մասին պատմող տեսանիւթը՝ մանկութիւնից մինչեւ եպիսկոպոսական աստիճանի հասնելը, որի միջոցով ներկայացւեց Սպահանի հայոց թեմի ազգային իշխանութեան պատասխանատու անձանց արտայայտութիւններն ու շնորհաւորանքները՝ ուղղւած առաջնորդ Սրբազան Հօրը: 

Այնուհետեւ բեմ հրաւիրւեց Թեհրանի հայոց թեմի առաջնորդական փոխանորդ գերշ. Տ. Մակար եպս. Աշգարեանը՝ ընթերցելու Մեծի Տանն Կիլիկիոյ Կաթողիկոս Ն.Ս.Օ.Տ.Տ. Արամ Ա Վեհափառ Հայրապետի ոսկետառ կոնդակը՝ ուղղւած թեմակալ առաջնորդին՝ իր յոբելեանական ամեակների առթիւ, որով Վեհափառ Հայրապետը բարձր գնահատելով Սրբազան Հօր ծառայական կեանքը՝ նրան շնորհել էր «Արքութեան» մեծ տիտղոսն ու պատիւը: Ներկաները, ովքեր յոտնկայս ունկնդրում էին սրբատառ կոնդակը, ծափողջուններով իրենց ուրախութիւնն ու խնդակցութիւնը յայտնեցին այդ կապակցութեամբ:

Բանախօսութեամբ հանդէս եկաւ գերշ. Տ. Վարուժան արքեպս. Հերկէլեանը: Նա գնահատելով թեմակալ առաջնորդին նւիրւած այս ձեռնարկը՝ որպէս ժողովրդի կողմից անկեղծ սիրոյ եւ երախտագիտութեան դրսեւորում, իբրեւ գերշ. Տ. Բաբգէն արքեպս. Չարեանի ընտանեկան ծանօթն ու հարազատը գեղեցիկ կերպով բնորոշեց Սրբազան Հօր յատկանիշներն ու իւրայատկութիւնները, նրա կերպարի մէջ զարգացած եւ մնայուն ներկայութիւն տեսնելով՝ ա) Հայ եկեղեցու հեզ եւ խոնարհ սպասաւորը, բ) Հաւատքով հարուստ եւ ճառագայթող հաւատարմութեամբ հոգեւորականը, գ) Սիրով լեցուն մարդը եւ 4) Հոգատար ծառայութեան եւ նւիրումի կոչւածը: Գերշ. Տ. Վարուժան արքեպս. Հերկէլեանն իր բովանդակալից խօսքի աւարտին նշեց. «Բաբգէն քահանան եւ եպիսկոպոսն իր սիրտը կենտրոնացրեց միայն ու միայն մնայուն եւ անփոխարինելի հարստութիւնների վրայ՝ Աստւած, եկեղեցի, հայրենիք, ազգ ու մշակոյթ, եւ նւիրումով ծառայեց նրանց ու դրանով դարձաւ ու կը մնայ ձեր մէջ իբրեւ մի մշակ՝ առանց ամօթի, նաեւ իբրեւ քաղցր, պայծառամիտ եւ վստահելի առաջնորդ»:

Շնորհաւորանքի եւ ողջոյնի խօսք փոխանցեց նաեւ Թեհրանի հայոց թեմի առաջնորդ գերշ. Տ. Սեպուհ արքեպս. Սարգսեանը: Նա գերշ. Տ. Բաբգէն արքեպս. Չարեանի համար նշւած բոլոր յատկութիւնների վրայ աւելացնելով հնազանդութեան առաքինութիւնը, յայտնեց, որ դրա շնորհիւ Սրբազան Հայրն իր ծառայական 30 տարիների ընթացքում եղել է արժանաւոր եւ հաւատարիմ միաբանը Մեծի Տանն Կիլիկիոյ Կաթողիկոսութեան միաբանութեան: Թեհրանի հայոց թեմի թեմակալ առաջնորդը գերշ. Տ. Բաբգէն արքեպս. Չարեանին փոխանցեց իր եւ Թեհրանի հայոց թեմի ողջ ժողովականութեան ու ժողովրդի շնորհաւորանքը եւ բարեմաղթանքը, Սրբազան Հօրը յանձնելով նրանց կողմից պատրաստւած նւէրը:

Յաջորդիւ արտայայտւեց Իրանի իսլ. հանրապետութիւնում Հայաստանի հանրապետութեան լիազօր դեսպան մեծարգոյ պրն. Գրիգոր Առաքելանը՝ իր եւ դեսպանութեան ողջ անձնակազմի կողմից շնորհաւորելով յոբելեարին քահանայական ձեռնադրութեան 30-ամեակի, առաջնորդական բեռն ստանձնելու 10-ամեակի եւ «Արքութեան» տիտղոսին արժանանալու կապակցութեամբ: Մեծարգոյ դեսպանը գերշ. Տ. Բաբգէն արքեպս. Չարենանին փոխանցեց Հայաստանի հանրապետութեան Մշակոյթի նախարարութեան «Գրիգոր Նարեկացի» յուշամեդալը, որը, ինչպէս պրն. Առաքելեանը նշեց՝ «Արժանի կերպով պէտք է զարդարի Սրբազան Հօր լանջքը»:

Յանուն Սպահանի հայոց թեմի Պատգամաւորական ժողովի, Թեմական ու Կրօնական խորհուրդների, Հաշւեքննիչ մարմնի եւ ազգային առաջնորդարանի բոլոր ենթամարմինների՝ շնորհաւորանքի եւ գնահատանքի խօսքերով հանդէս եկաւ Պատգամաւորական ժողովի ատենապետ պրն. Վարուժ Մինասեանը, յիշեցնելով, որ յոբելեար Սրբազան Հայրը ոչ միայն իր ժողովրդի կողմից սիրոյ եւ յարգանքի է արժանանում, այլ մեծապէս յարգւում եւ մեծարւում է Իրանի պետական այրերի եւ հաստատութիւնների կողմից:

Հոգշ. Տ. Անանիա վրդ. Գուճանեանը ներկայացնելով Սրբազան Հօրն ուղղւած շնորհաւորական ուղերձների շարքը, առանձնաբար ընթերցեց միջոցառմանը բացակայ Ատրպատականի հայոց թեմի առաջնորդ գերշ. Տ. Գրիգոր եպս. Չիֆթչեանի ուղերձից հատւածներ, որտեղ ասւած էր. «Նոր Ջուղային յատուկ մշակութային արժէքների հանդէպ մեծ սէրը, բանիւ եւ գործով արտայայտութիւն գտաւ ձեր կեանքում անցած տարիներին... Դուք եղաք այն եզակի հոգեւորականը, ով Հայ Դատը քաջաբար ներկայացրեց Եւրոպական խորհրդարանի ներկայացուցչին, հայ մշակոյթով յագեցած եւ հայ հանճարեղ ստեղծագործութեան նմոյշ Ս. Ամենափրկչեան Վանքին նրա տւած այցի ակնթարթային պահը օգտագործելով: Հայ մտաւորականութիւնը եւ հայ մշակոյթը բնաջնջել փորձած ցեղասպանի դէմ ձեր բարձրացրած արդար դատը, եւրոպական եւ միջազգային մամուլի արձագանքներով մեծապէս արժեւորւեց, մեր ժողովրդի բարձրաղաղակ ձայնը հանդիսանալով աշխարհի ամբողջ տարածքում»:

Յոբելեարին իրենց կատարումները նւիրեցին՝ Շահինշահրի «Նարօտ» մանկա-պատանեկան երգչախումբը՝ երեք երգեր ձօնելով Սրբազան Հօրը, Արսինէ Ալեքսանդրեանը, ով մայեստրօ Համիկ Ալեքսանդրեանի նւագակցութեամբ կատարեց «Հաւուն-հաւուն» եւ «Տաղ Աստւածածնի» հոգեւոր երգերը, Մեղրի Ղուկասեանը եւ Գայիանէ Գէորգեանը՝ արտասանելով «Եկեղեցին հայկական» եւ «Մեր տաճարները» բանաստեղծութիւնները, Թանիա Մինասեանը եւ Վանայ Շիրւանեանը՝ կատարելով «Մայրիկ» եւ «Հայաստան» երգերը, եւ Ն.Ջ. Հայ Մ.Մ. «Արարատ» Միութեան Մշակութային միաւորի «Կռունկ» պարախումբը՝ ներկայացնելով «Զարթօնք» եւ «Տօնական» պարերը:

Հանդիսութիւնն եզրափակւեց Սպահանի Հայոց Թեմի բարեջան առաջնորդ գերշ. Տ. Բաբգէն արքեպս. Չարեանի շնորհակալական եւ գնահատանքի խօսքերով՝ ուղղւած բոլոր այն մարմիններին ու անձերին, ովքեր ձեռնարկի իրականացման միջոցով իրենց սէրն ու յարգանքը ցուցաբերեցին առաջնորդ Սրբազան Հօրը: Թեմակալ առաջնորդն իր խօսքի մէջ շեշտեց, որ իրեն տրւած մեծագոյն նւէրը համայնքի զաւակների կողմից իր նկատմամբ դրսեւորւած նոյն այդ սիրոյ արտայայտութիւնն է, ինչն առաւել զօրութիւն է ներշնչում՝ հոգեւորականի եւ ծառայական իր պարտականութիւններն առաւել յանձնառութեամբ եւ ոգեւորւածութեամբ կատարելու:

Լուսանկարիչ՝ Գեւիկ Խաչատրեան