Շահինշահրի Համայնքային Վարչութեան կողմից կեանքի կոչւած «Տարեցների տարւայ» միջոցառումները կազմակերպող յանձնախումբն իր եզրափակիչ ձեռնարկը նշեց ուրբաթ` 2014 թւականի դեկտեմբերի 5-ին, «Սրբոց Վարդանանց» դպրոցի սրահում: Համայնքի տարեցների պատւին կազմակերպւած այս ձեռնարկին ներկայ էին համայնքիս հոգեւոր տեսուչ Տ. Անանիա Վրդ. Գուճանեանը, Համայնքային Վարչութեան անդամները եւ մեծ թւով հրաւիրեալ պապիկներ, տատիկներ ու պատկառելի տարեցներ:

Բարիգալստեան խօսքով հանդէս եկաւ յանձնախմբի ատենադպրուհի տկն. Սելինէ Յովհաննիսեանը: Նա ամփոփ կերպով զեկոյց ներկայացրեց յանձնախմբի մէկամեայ գործունէութեան վերաբերեալ, որը բովանդակում էր նախաձեռնութիւններ, միջոցառումներ եւ դասախօսական երեկոներ: Զեկոյցում մասնաւորապէս նշւած էր, որ յանձնախումբը հոգատար վերաբերմունք դրսեւորելով տարեցների հանդէպ, այցելութեան է գնացել նրանց՝ հոգշ. Հայր Սուրբի առաջնորդութեամբ եւ բրշն. Ռազմիկ սրկ. Գալստանեանի ուղեկցութեամբ: Աւարտելով զեկոյցը, տկն. Յովհաննիսեանը շնորհակալութիւն յայտնեց հոգշ. Հայր Սուրբին, նրա հայրական խորհուրդների եւ ցուցումների համար, Համայնքային Վարչութեանը՝ յանձնախմբին հովանաւորելու համար, յանձնախմբի աշխատանքները համադրող պրն. Ռազմիկ Մարկոսեանին, ինչպէս նաեւ պրն. Մարտիկ Յովհաննիսեանին, որն իր երաժշտական գեղեցիկ կատարումներով ողջ հանդէսների ընթացքում զւարճալի պահեր մատուցեց ներկաներին: Այնուհետեւ նա բեմ հրաւիրեց պրն. Ռազմիկ Մարկոսեանին որպէս օրւայ հանդիսավար:

Վերջինս իր գեղեցիկ եւ դիպուկ արտայայտութիւններով, անեկդոտներով եւ մէջբերումներով աշխուժացրեց ձեռնարկը եւ բեմը տրամադրելով ներկաներին առիթ ստեղծեց կամաւորների համար արտայայտւելու, որոնք ներկայացան բարեմաղթանքներով, երգերով ու ասմունքներով:

Իսկ ձեռնարկը ուրախ հանդէսի վերածւեց շնորհալի երաժիշտ Մարտիկ Յովհաննիսեանի երաժշտական խանդավառ կատարումների շնորհիւ: Շատ չանցած հայկական ուրախ մեղեդին պարի հրաւիրեց բոլորին եւ ներկաները շրջպար կազմած զարդարեցին պարահրապարակը:

Տեղի ունեցան նաեւ հաճելի մրցոյթներ եւ յաղթողները արժանացան համեստ մրցանակների:

Հնչող բարեմաղթանքներին միացաւ Համայնքային Վարչութեան նախագահ՝ պրն. Մելքոն Շիրւանեանը, որը բարձր գնահատեց յանձնախմբի կատարած աշխատանքները եւ շնորհակալութիւն յայտնեց յանձնախմբի անդամներին ցուցաբերած հետեւողականութեան, հոգատարութեան եւ կազմակերպւածութեան համար:

Իբրեւ եզրափակիչ խօսք հնչեց հոգշ. Հայր Սուրբի ոգեշունչ հայրական պատգամը, որը դրւատելով յանձնախմբի իրագործած մէկամեայ աշխատանքը, ոյժ ու կորով մաղթեց անդամներին: Հայր Սուրբն իր խորունկ սէրն ու գուրգուրանքը յայտնեց համայնքի անդամներին՝ ի մասնաւորի պատկառելի տարեցներին, մաղթելով նրանց երջանիկ ծերութիւն եւ երկարակեցութիւն: Յորդորեց համայնքի անդամներին միշտ լինել միասնական, կողք-կողքի եւ միահամուռ, որպէսզի յաջողութեամբ պսակւի ցանկացած հաւաքական աշխատանք: Հայր Սուրբն եզրափակելով իր խօսքը՝ իր հնչեղ եւ յուզառատ ձայնով, «Մայրիկ» երգը նւիրեց բոլոր հայ մայրերին, որն արժանացաւ ներկաների անխնայ եւ առատ ծափողջոյններին:

Վերջում տեղի ունեցաւ թէյասեղան եւ ճաշկերոյթ:

Առաւօտեան ժամը 11-ից սկսած սոյն հանդէսը տեւեց մինչեւ կէսօրից յետոյ ժամը 4ը, զւարթ ու անմոռանալի պահեր պարգեւելով մասնակիցներին:

Սոյն յանձնախմբում ամենայն նւիրւածութեամբ աշխատեցին պրնյք. Եղիշ Աղախանեանը, Վրէժ Սահակեանը, Ռոբերտ Գորգին եւ տկնյք. Արմիկ Թորոսեանը, Քարմէն Յակոբեանը, Արմինէ Թահմազեանը, Սելինէ Յովհաննիսեանը, Լինա Մովսիսեանը եւ Լիդուշ Քամարզարեանը: