Թւականիս հոկտեմբերի 11-ի երեկոյեան, Նոր Ջուղայի Հայ Մ.Մ. «Արարատ» միութեան սրահում տեղի ունեցաւ բանախօսական եւ գեղարւեստական յայտագրով հագեցած ձեռնարկ, որի նախաձեռնութիւնը միութեան Մշակութային միաւորի վարչութեանն էր: Հանդիսութեանը ներկայ էին Սպահանի Հայոց թեմի առաջնորդ Տ. Բաբգէն եպսկ. Չարեանը, քահանայից դասի, ազգային իշխանութեան եւ ազգային այլ մարմինների ներկայացուցիչներ, Հայ Դատի շրջանիս յանձնախմբի ներկայացուցիչը, ուսուցիչ-ուհիներ, մշակութային ասպարէզում աշխատողներ, միութենականներ եւ այլ ներկաներ: Օրւայ առթիւ Թեհրանից հրաւիրւած էր բանախօսելու իրանահայ անւանի բանաստեղծ Վարանդը: Յարգելի բանախօսը իր ելոյթը սկսեց օրւան համահունչ բանաստեղծութեամբ, ապա անդրադառնալով համաշխարհայնացման եւ հակամշակութային այն խնդիրներին, որոնք այսօր վտանգում են ժողովուրդների տոհմիկ մշակոյթը, նշեց, որ ազգային ոգեղէն հարստութիւնը փրկելու եւ յարատեւ դարձնելու մտահոգութիւնը պէտք է դարձնել մեր առօրեան եւ շեշտը դնել մեր մշակոյթի վաղեմութեան, մանաւանդ դէպի ապագայ երկարող մեր ճիւղի թարմութեան ու դալարութեան վրայ՝ ինչը պատմութեան բոլոր դժւարին փուլերի ընթացքում եղել է մեր յարատեւման երաշխիքը: Բանախօսը բնութագրելով մշակոյթ հասկացութիւնը, մէջբերում կատարեց նաեւ անւանի հոգեբան դոկտոր-պրոֆեսոր Ալբերտ Նալչաջեանի գիտական կարծիքը մշակոյթի մասին եւ ասաց. «Անտեսել ու մոռանալ սեփական մշակոյթը, նոյնն է ինչ ապրել առանց էութեան, առանց ինքնութեան, առանց ոգու, առանց դէմքի ու դիմագծի»: Նա հետաքրքիր մեկնաբանութիւններով շարունակեց իր ելոյթը եւ եզրափակեց «Այցելականութիւն» խորագրով հեղինակային քերթւածքի արտասանութեամբ:
Գեղարւեստական բաժնում «Կռունկ» համոյթի ասմունքի խմբից Մեղրի Ղուկասեանը ասմունքեց Համօ Սահեանի «Կը մնամ քեզ հետ» բանաստեղծութիւնը, Կարէն Խանլարեանը՝ Յ. Շիրազի «Անքաւելի մեղք»-ը, Թանիա Մինասեանը եւ Ալինա Ալեքսանդրեանը միասնաբար ներկայացրին Վահագն Դաւթեանի «Կոմիտաս»-ը, որը համեմւած էր «Սարերի հովին մեռնեմ» եւ «Գարունա» երգերի հատւածներով, իսկ Նազէ Ասատրեանը՝ Յ. Թումանեանի «Թագաւորն ու Չարչին» բալլադը: «Կռունկ» պարախումբը ներկայացրեց «Շատախի» եւ «Հանինօ» պարային համարները, բեմադրութեամբ՝ Հայաստանից հրաւիրւած խմբի պարուսոյց՝ Յակոբ Մարգարեանի: Մեներգերով հանդէս եկան Մշակութային միաւորի Էստրադային խմբի անդամներ՝ Նայիրի Ղազարեանը «Երեւան» ու «Հայաստան» երգերով եւ Զարենուշ Աղուրեանը՝ «Գարնան հովի հետ արի» երգով: Գեղարւեստական յայտագրի ղեկավարն էր տկն. Ռիմա Սիմոնեանը։
Նշելի է, որ այս տարի լրանում է Կոմիտասի ու Թումանեանի ծննդեան 145 եւ Շիրազի ու Համօ Սահեանի ծննդեան 100-ամեակը եւ պատահական չէր, որ բեմում տեղադրւած էր նրանց պատկերները եւ երեկոյի հաղորդավարուհի՝ Շաղիկ Մատթէոսեանը Ս. Մեսրոպ Մաշտոցի մեծ վաստակին անդրադառնալուց զատ ծրագրի ընթացքում ներկայացրեց նաեւ նշեալ չորս մեծութիւններին:
Ծրագրի աւարտին թեմակալ առաջնորդ Գերշ. Տ. Բաբգէն եպսկ. Չարեանը եզրափակիչ խօսքում ակնարկելով Ս. Մեսրոպ Մաշտոցի եւ թարգմանիչ վարդապետների սրբազան գործին, անդրադարձաւ Հայ մշակոյթի առթիւ նոյն օրը Ս. Ամենափրկիչ վանքի «Յովսէփ Արեմաթացի» եկեղեցում Ս. Պատարագով սկսած, Մեսրոպ Մաշտոցի կիսանդրու մօտ Հայոց ազգային դպրոցների աշակերտական ելոյթներով շարունակւած եւ երեկոյի ձեռնարկով աւարտւած տօնակատարութեանը, ապա գնահատանքի խօսք ուղղեց յարգելի բանախօսին, գեղարւեստական յայտագրի մասնակիցներին ու պատասխանատուներին: Սրբազան Հայրն իր խօսքի մէջ անդրադառնալով ահաբեկչական խմբաւորման միջոցով Սիրիայի Դեր Զօր քաղաքի Սրբոց Նահատակաց եկեղեցու պայթեցմանը, միեւնոյն ժամանակ մատնացոյց արեց բեմում ներկայ երիտասարդութեանը եւ ասաց, որ եթէ մենք ունենք նման երիտասարդութիւն, թշնամուն չի յաջողւի սպանել մեր հոգին եւ հայը կապրի յաւիտեան:
