Ն.Ջ. Հայ Մ.Մ. «Արարատ» միութեան Երէցների միաւորի վարչութեան նախաձեռնութեամբ եւ համագործակցութեամբ միաւորի ամբողջ կազմի, ուրբաթ՝ 2014 թւականի սեպտեմբերի 5-ի երեկոյեան միութեան բացօդեայ տարածքում տեղի ունեցաւ ձեռնարկ, որի նպատակն էր համախմբել համայնքի անդամներին ու նախատեսած ձեռնարկով վերյիշեցնել մօտ անցեալում մեր ապրած կամ լսած այն պարզ ու անապաճոյճ կեանքը, որ 21-րդ դարի մեքենայացած միջավայրը խլել է մեզանից:

Անցեալը վերապրեցնելու համար, միաւորը կազմակերպել էր մի փոքրիկ, բայց խոր բովանդակութեամբ ցուցահանդէս: Այն ներկայացնում էր ժամանակին օգտագործւող հագուստներ, կենցաղային իրեր, ձեռարւեստի նմոյշներ եւ ընտանեկան ու անհատական հին լուսանկարներ. մատակարարւող ուտեստները նոյնպէս ներկայացնում էին աւանդական խոհանոցը:

Ծրագրի ընթացքում Սեդա Բարղեանը միաւորի խօսքը ներկայացնելով՝ բնութագրեց ջուղայեցիների վարքն ու բարքը, սովորութիւններն ու աւանդոյթները, ջուղայեցու խոհանոցը, արւեստն ու արհեստը եւ նրան բնորոշ յատկապէս հայրենասէր, հիւրասէր ու աւանդոյթները պահպանող յատկանիշները:

Երեկոն գոհունակութեամբ վայելեց ներկայ բազմութիւնը: