Նոր Ջուղայի Հայ Մ.Մ. «Արարատ» միութեան Սկաուտական միաւորի Գերագոյն մարմնի նախաձեռնութեամբ, նոյն միաւորի կազմակերպիչ յանձնախմբի կազմակերպութեամբ եւ միութեան Մարզական միաւորի համագործակցութեամբ տեղի ունեցաւ ամենամեայ կարգով իրականացւող ֆուտբոլի մրցաշարը, որի բացումը կատարւեց հինգշաբթի՝ յուլիսի 25-ին, «Արարատ» միութեան մարզասրահում։ Բացման երեկոյին ներկայ էին՝ թեմի ազգային մարմինների, շրջանի Հայ Դատի յանձնախմբի եւ «Արարատ» միութեան Կենտ. վարչութեան ներկայացուցիչներն ու ժողովուրդ։

Երեկոն սկիզբ առաւ Սկաուտական միաւորի Արի-Արենուշ հատւածի ներկայացուցիչների միջոցով Հ.Հ. եռագոյն դրօշի եւ անձնազոհ հինգ մարտիկների նկարների սրահ մուտք գործելով, ապա ներկաների մէկ րոպէ յոտնկայս լռութեամբ յարգւեց այդ հերոսների անմոռաց յիշատակը։

Այնուհետեւ հնչեց բացման խօսքը հաղորդավար Վանէ Յովսէփեանի միջոցով, որտեղ շեշտւած էր, թէ նման յուշերեկոներն ու միջոցառումները քանդելու են լռութեան պատերը, յայտնելու են հայ երիտասարդի կամքն ու պատրաստակամութիւնը՝ յանուն հայրենիքի պայքարը շարունակելու համար եւ համայն հայութեան պահանջատէր ձայնն են լսելի դարձնելու աշխարհին։

Շարունակութեան մէջ Սկաուտական միաւորի Գերագոյն մարմնի անունից ելոյթով հանդէս եկաւ Վանիա Պետրոսեանը, ով շեշտեց, որ ժամանակը փոխւել է, բայց պայքարը չի դադարել, որքան էլ պէտք լինի պիտի շարունակւի նոյն վճռակամութեամբ՝ մինչեւ բռնագրաււած հողերի վերադարձը, արդար հատուցման իրականանալը եւ ազատ, անկախ ու ամբողջական Հայաստանի կերտումը։

Ընթացքում ցուցադրւեց Լիսբոնի գործողութեանն անդրադարձող տեսանոյթ, իսկ Սկաուտական միաւորի «Գայլիկ» հատւածի անդամ Մենուա Մարկոսեանն ասմունքեց «Ընդդիմախօսութիւն» բանաստեղծութիւնը։

Բացման երեկոյին յաջորդեց ընկերական խաղ՝ «Արարատ» միութեան մանկա-պատանեկան ֆուտբոլի խմբերի միջեւ, ապա մեկնարկեց համայնքի երիտասարդներից կազմւած 7 սիրողական խմբերի մրցաշարը, որը շարունակւեց յաջորդ հինգ օրերի ընթացքում։ Մասնակից խմբերի անուններն էին՝ «Արմէն», «Ուրարտու», «Լիսբոն», «Արացխ», «Արարատ», «Ախթամար» եւ «Րաֆֆի»։

Երեքշաբթի՝ յուլիսի 30-ին, տեղի ունեցաւ մրցաշարի եզրափակիչ խաղը, «Արարատ» եւ «Արցախ» խմբերի միջեւ, որը յաղթող ճանաչւեց «Արցախ»-ը։ Խաղերի լաւագոյն ռմբարկու հանդիսացաւ Էդրին Թորոսեանը, իսկ կարգապահ մարզիկի կոչումն ստացաւ Սեւադա Պետրոսեանը։ Յատուկ գնահատւեց նաեւ «Արարատ» խումը՝ իրենց մարզական շապիկների յետեւի բաժնում Լիսբոնի հինգ տղաների պատկերը դաճելու համար։

Իրաւարար կազմի անդամներն էին՝ Ռուբիկ Պարսամեանը, Մելքոմ Քեշիշեանը, Արին Խաչիկեանն ու Արթին Մելիքեանը։

Մրցաշարի փակման ծրագիրը դարձեալ վարեց Վանէ Յովսէփեանը, իսկ եզրափկիչ խաղի խմբեր, ինչպէս նաեւ իրաւարար կազմի անդամների շնորհակալագրերն ու յուշանւէրները յանձնեցին՝ «Արարատ» միութեան Կենտ. վարչութեան անդամներ՝ Մանիա Ղուկասեանը, Յովիկ Աւետեանն ու Վահիկ Ծատուրեանը, Սկաուտական միաւորի Գերագոյն մարմնից՝ Արթին Վարդանեանն ու Նարեգա Սիմոնեանը եւ Կազմակերպիչ յանձնախմբից Սեպուհ Վարդանեանը։ 

Աւելացնենք նաեւ, որ մրցաշարի ընթացքում, ընդմիջումների ժամանակ սրահում ցուցադրւում էին Լիսբոնի հինգին անդրադարձող տեսանիւթեր ու երգեր՝ Հ.Յ.Դ. «Ռուբէն» երիտ. միութեան նախաձեռնութեամբ եւ կազմակերպութեամբ։

Թղթակից (Նոր Ջուղա)