Աղբիւր՝ www.alikonline.ir 

Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը «Ֆարս» լրատւական գործակալութեանը տւած ասուլիսում ընդգծել է, որ Ղարաբաղի հարցով կողմերի միջեւ տարաձայնութիւնը չունի զինւորական լուծում եւ անհրաժեշտ է այն կարգաւորել բանակցային սեղանի շուրջ:

Հարցազրոյցի ընթացքում նա ասել է, որ կողմերը անյապաղ պիտի ընդունեն առանց նախապայմանի հրադադար եւ խնդիրները կարգաւորւեն բանակցային գործընթացով: Պատգամաւոր Շահվերդեանը ընդգծել է, որ հակամարտութեան շարունակւելը միայն յանգեցնում է խաղաղ բնակչութեան զոհւելուն եւ քաղաքների աւերմանը, իսկ հակամարտութեան շահող կողմերն են միայն ԱՄՆ-ը, սիոնիստական վարչակարգը եւ իրենց դաշնակիցները:

Պատգամաւորը ընդգծել է, հակամարտութեան թիկունքում նկատելի է ԱՄՆ-ի եւ սիոնիստական վարչակարգի գործակցութիւնը, որոնք թաքֆիրականներ ուղարկելով, անապահով են դարձնում տարածաշրշանը: Պատգամաւորի հաւաստմամբ. «Ուշադրութեան արժանի կէտը հետեւեալն է, որ հակամարտութիւնը շատ մօտ է Իրանի սահմաններին եւ ամերիկացիները մտադիր են, այսպիսով անապահովութիւնը ըստ հնարաւորին մօտեցնել Իրանի սահմաններին»:

Հարցազրոյցի վերջում պատգամաւորը նշել է. «Հակամարտութեան հարցով Իրանում պիտի լսւի միասնական եւ միատարր ձայն, անհրաժեշտ է խուսափել այս մասին զանազան դիրքորոշումներից: Բոլորս պէտք է մտածենք Իրանի եւ Իրանի տարածքային ամբողջականութեան ու անվտանգութեան մասին»: