Լեռնային Ղարաբաղում պատերազմական իրավիճակի վերաբերեալ համատեղ յայտարարութեամբ են հանդէս եկել Իսլ. խորհրդարանում իրանահայութեան զոյգ պատգամաւորները՝ Ռոբերտ Բեգլարեանը եւ Արա Շահվերդեանը: Տեղեկացնում է «alikonline.ir»-ն:
Յայտարարութեան մէջ մասնաւորապէս նշւած է. «Այս օրերին մենք կրկին ականատեսն ենք Լեռնային Ղարաբաղում պատերազմի բռնկմանը: Անկախ այս հակամարտութեան պատճառներից եւ արմատներից, միշտ էլ մտահոգիչ է եղել այլ երկրների եւ ատարածաշրջանային ուժերի, այդ թւում՝ սիոնիստական ռեժիմի միջամտութիւնն այս հակամարտութեանը: Չնայած Իրանի Իսլամական Հանրապետութեան քաղաքականութիւնը մշտապէս ուղղւած է եղել նպաստելու խնդրի՝ երկխօսութեան եւ բանակցութիւնների միջոցով լուծմանը, այլ դերակատարները, մասնաւորապէս՝ Թուրքիան կոկորդիլոսի արցունք թափելով, գաղտնի կամ բացայայտ թէժացրել են հակամարտութիւնը: Թուրքիայի ամբողջատիրական կառավարութիւնը այժմ խախտում է մարդասիրական բոլոր չափանիշները՝ գործի դնելով թաքֆիրական վարձկաններին, եւ, քանի որ պատերազմի առանցքային կենտրոնները գտնւում են մեր երկրի սահմանների մօտ, դա կարող է պոտենցիալ սպառնալիք հանդիսանալ մեր երկրի անվտանգութեան եւ տարածքային ամբողջականութեան համար: Եւ հէնց այս հանգամանքից ելնելով, կենսական նշանակութիւն ունի որպէսզի մենք՝ իրանցիներս, անկախ մեր կրօնական հաւատամքից, դաւանանքից կամ էթնիկ պատկանելութիւնից, պահպանենք զգօնութիւնը, որպէսզի, գիտակցաբար կամ անգիտակցաբար, չվնասենք մեր ազգային անվտանգութեանն ու հասարակական միասնականութեանը՝ թոյլ տալով, որ մեր երկրի պաշտօնական ներկայացուցիչներն ու պաշտօնեաներն իրենց կենտրոնացած եւ համադրւած ջանքները գործադրեն խաղաղութիւն հաստատելու համար: Ազգային շահերը եւ վերոնշեալ մտահոգութիւններից ելնելով, մենք ականատես ենք մեր երկրի արտաքին քաղաքական գերատեսչութեան զգօնութեանը եւ օպերատիւ արձագանքնմանը: Հաշւի առնելով տարածաշրջանային եւ արտատարածաշրջանային զգայուն խնդիրներն ու մարտահրաւէրները եւ մարդկային կորուստների կանխման անհրաժեշտութիւնը, կարծում ենք, որ Իրանի դիւանագիտական համակարգի ջանքերը պէտք է ուղղւած լինեն վերջնական, համապարփակ եւ արդիւնաւէտ արդիւնքի հասնելուն, որպէսզի խաղաղութիւնը վերադառնայ տարածաշրջան եւ երկխօսութիւնը փոխարինի ուժի կիրառմանը»: