Հայաստանի Հանրապետութեան վարչապետ Նիկոլ Փաշինեանը Իրանի Իսլ. Հանրապետութիւն կատարած իր պաշտօնական այցի ծիրում, հինգշաբթի՝ 2019 թւականի փետրւարի 28-ի առաւօտեան, իր տիկնոջ Աննա Յակոբեանի, ՀՀ ազգային ժողովի ու կառավարութեան բարձրաստիճան պաշտօնատարներից կազմւած պատւիրակութեան եւ Իրանում ՀՀ արտակարգ եւ լիազօր դեսպան Արտաշէս Թումանեանի ընկերակցութեամբ ժամանեց Սպահան: 

Վարչապետին Սպահանի “Շահիդ Բեհեշթի” օդանաւակայանում դիմաւորեց Սպահանի նահանգապետ Աբբաս Ռեզային: Դիմաւորման արարողութեանը ներկայ էին նաեւ Սպահանի հայոց թեմի առաջնորդ գերշ. Տ. Սիփան եպս. Քէչէճեանը, Թեմական եւ Կրօնական խորհուրդների ատենապետներ՝ Վարուժ Մինասեանն ու Վարուժ Մովսիսեանը եւ շրջանի Հայ Դատի յանձնախմբի ներկայացուցիչ Վահէ Թորոսեանը: 

Այնուհետեւ պրն. Ռեզայիի ուղակցութեամբ Նիկոլ Փաշինեանն այցելեց “Նաղշէ Ջահան” հրապարակ, ուր լինելով “Իմամ” մզկիթում եւ նշւած հրապարակում  գտնւող մի շարք այլ պատմա-մշակութային կառոյցներում, մօտիկից ծանօթացաւ սոյն վայրերի պատմութեանն ու հոգեւոր եւ մշակութային արժէքներին:

Շրջայցի աւարտին “Աբբասի” հիւրանոցում կայացաւ աշխատանքային ճաշկերոյթ, որտեղ պրն. Փաշինեանը կարեւորելով Հայաստանի մարզերի եւ Իրանի նահանգների միջեւ համագործակցութիւնը, յատկապէս շեշտեց, թէ սոյն համագործակցութեանը նպաստելու են փոխադարձ այցելութիւններն ու գործնական քայլերի իրականացումը:

Սպահանի նահանգապետը շնորհակալութիւն յայտնելով Հայաստանի վարչապետին Սպահան կատարած այցելութեան համար՝ բարձր գնահատեց տեղի հայ համայնքի դերը նահանգի զարգացման գործում:

Պաշտօնական ճաշկերոյթին հրաւիրւել եւ ներկայ էին Իսլ. Խորհրդարանում Սպահանի եւ հարաւային իրանահայութեան պատգամաւոր Ժորժիկ Աբրահամեանն ու Թեմական խորհրդի ատենապետ Վարուժ Մինասեանը:

Թղթակից (Նոր Ջուղա)