ՎԻԳԷՆ ՍԱՐԳՍԵԱՆԻ ԳԼԽԱՒՈՐԱԾ ՊԱՏՒԻՐԱԿՈՒԹԻՒՆԸ ՄԵԿՆԵԼ Է ԻՐԱՆ

ԻԻՀ Պաշտպանութեան եւ զինւած ուժերի աջակցման նախարար Հոսէյն Դեհղանի հրաւէրով ՀՀ Պաշտպանութեան նախարար Վիգէն Սարգսեանի գլխաւորած պատւիրակութիւնը յունւարի 30-ին պաշտօնական այցով մեկնել է Իրանի Իսլամական Հանրապետութիւն:

Աղբիւր՝ www.yerkirmedia.am

ՍԱՐԳՍԵԱՆՆ ՈՒ ԴԵՀՂԱՆԻՆ ԱՆԴՐԱԴԱՐՁԵԼ ԵՆ ԼՂ ՀԱԿԱՄԱՐՏՈՒԹԵԱՆ ԿԱՐԳԱՒՈՐՄԱՆ ԽՆԴՐԻՆ

Պաշտօնական այցով Իրանում գտնւող Հայաստանի պաշտպանութեան նախարար Վիգէն Սարգսեանն հանդիպել է այդ երկրում իր պաշտօնակից Հոսէյն Դեհղանին: Նախարարները քննարկել են երկկողմ յարաբերութիւններին առնչւող հարցեր, ինչպէս նաեւ միջազգային ու տարածաշրջանային անվտանգութեանը վերաբերող եւ հակամարտութիւնների կարգաւորմանն առնչւող խնդիրներ:

Անդրադառնալով ԼՂ հակամարտութեան կարգաւորման խնդրին եւ կարեւորելով տարածաշրջանում խաղաղութեան ու կայունութեան պահպանման ուղղութեամբ գործադրւող ջանքերը, կողմերն ընդգծել են խնդրի խաղաղ, բացառապէս բանակցային ճանապարհով կարգաւորման անհրաժեշտութիւնը:

Այնուհետ նախարարի գլխաւորած պատւիրակութիւնն այցելել է Թեհրանում գտնւող «Մալէք Աշթար» համալսարան, որի գործունէութեան հիմնական ուղղութիւններից մէկը պաշտպանական ոլորտին առնչւող նախագծերի իրականացումն է: Վիգէն Սարգսեանն ընդգծել է, որ երկու երկրների համագործակցութիւնը պէտք է խորացնել նաեւ գիտական հարթութիւնում:

Աւելի ուշ հայկական պատւիրակութիւնն այցելել է պաշտպանական ոլորտի համար տեխնոլոգիական լուծումներ նախագծելու եւ իրականացնելու մէջ մասնագիտացած` «Իրանի էլեկտրոնային արդիւնաբերութիւն» ընկերութիւն:

Աղբիւր՝ www.yerkir.am

ՀՀ ՊԱՇՏՊԱՆՈՒԹԵԱՆ ՆԱԽԱՐԱՐԸ ԹԵՀՐԱՆՈՒՄ ԱՅՑԵԼԵԼ Է ԻՄԱՄ ԽՈՄԷՅՆԻԻ ԴԱՄԲԱՐԱՆ

ՀՀ Պաշտպանութեան նախարար Վիգէն Սարգսեանի գլխաւորած պատւիրակութիւնը յունւարի 31-ին Թեհրանում այցելել է Իմամ Խոմէյնիի դամբարան:

Վիգէն Սարգսեանը ծաղկեպսակ է դրել Իմամի Խոմէյնիի շիրիմին, յարգանքի տուրք մատուցել Իրանի Իսլամական յեղափոխութեան Հոգեւոր առաջնորդի յիշատակին: