Եթէ ամէն ինչ լաւ ընթանայ, մինչ խորդադ ամիսը Էմամ Խոմէյնիի հրամանի գործադիր շտաբում կունենանք իրանական արտադրութեան կորոնավիրուսի դէմ պատւաստանիւթ: Այս մասին ԻՍՆԱ հետ զրոյցում յայտարարել է Էմամ Խոմէյնիի հրամանի գործադիր շտաբում կորոնավիրուսի դէմ իրանական պատւաստանիւթի արտադրութեան նախագծի գլխաւոր հետազօտող, Կորանավիրուսի դէմ պայքարի ազգային շտաբի գիտական յանձնաժողովի անդամ դոկտ. Մինու Մոհրէզը: Տեղեկացնում է alikonline.ir-ը:

Դոկտ. Մոհրէզն անդրադառնալով իրանական արտադրութեան պատւաստանիւթի վերջին կլինիկական փորձարկման արդիւնքներին ասել է. «Մինչ այժմ կորոնավիրուսի դէմ իրանական արտադրութեան պատւաստանիւթը ներարկւել է 21 մարդու, եւ գործընթացը պէտք է շարունակւի: Մարդկանց վրայ պատւաստանիւթի փորձարկման առաջին փուլում մենք հիմնականում ուսումնասիրում ենք դրա հնարաւոր կողմնակի ազդեցութիւնները: Բարեբախտաբար, այս պատւաստանիւթը մինչ այժմ լուրջ կողմնակի բարդութիւններ չի ունեցել»:

Գիտնականը նշել է, որ պատւաստանիւթ ստացող կամաւորների նոր խումբն աստիճանաբար կը ներգրաււի գործընթացում. «Այս գործընթացը կը շարունակւի այնքան ժամանակ, մինչ բոլոր 56 կամաւորներին առաջին փուլում կը ներարկւի պատւաստանիւթ, որից յետոյ մենք կը ներկայացնենք յստակ վերլուծութիւն առաջին փուլի արդիւնքների մասին, եւ անհրաժեշտ թոյլտւութիւնները ստանալուց յետոյ կը մեկնարկենք կլինիկական փորձարկման երկրորդ փուլը, որին նախատեսւում է ներգրաււել 300 կամաւորի»,- ասել է նա:

Դոկտ. Մոհրէզը յոյս է յայտնել, որ փորձարկումների յաջող աւարտի արդիւնքում, խորդադ ամսին կը մեկնարկի կորոնավիրուսի դէմ իրանական արտադրութեան պատւաստանիւթի արտադրութիւնը: