Աղբիւր՝ www.alikonline.ir
Շաբաթ, փետրւարի 15-ի երեկոյեան ժամը 3։30-ին Թեհրանի Կրօնների երկխօսութեան կենտրոնում, կազմակերպութեամբ Իսլամական միջազգային հաղորդակցութեան կենտրոնի ու Եկեղեցիների համաշխարհային խորհրդի, տեղի ունեցաւ երկօրեայ համագումարի բացումը։
Սոյն համագումարին մասնակցում էին՝ Շւէյցարիայից, Գերմանիայից, Պակիստանից, Լիբանանից եւ այլ երկրներից զանազան եկեղեցիների ներկայացուցիչներ, Թեհրանից որոշ քրիստոնեայ փոքրամասնութեանց ներկայացուցիչները, ինչպէս նաեւ՝ զրադաշտականների ներկայացուցիչները։
Վերոյիշեալ երկխօսութեան աշխատանքները սկիզբ էին առել 1999 թւականին՝ Շւէյցարիայի Ժնեւ քաղաքում։ Իսկ այս համագումարը արդէն նախորդների շարքում 7-րդ համագումարն էր հանդիսանում։
Նշենք, որ համագումարին ներկայ էր նաեւ Թեհրանի հայոց թեմի առաջնորդ Տ. Սեպուհ արք. Սարգսեանը՝ որպէս սոյն կազմակերպութեան գործադիր մարմնի անդամ եւ դասախօս։ Առաջնորդ Սրբազան Հօրն ընկերակցում էին՝ առաջնորդական փոխանորդ Տ. Մակար ծ. վրդ. Աշգարեանը, Էդմոնդ Բեջանեանն ու Ագաթա Աբրահամեանը։
Բացման խօսքն ասաց Կրօնների երկխօսութեան կենտրոնի տնօրէն դոկտ. Հելմին։ Կազմակերպութեան նորանշանակ նախագահ դոկտ. Էբրահիմին իր հերթին ողջունեց ներկաներին եւ մասնաւոր կերպով իր ուրախութիւնը յայտնեց առաջնորդ Սրբազան Հօր ներկայութեան համար։ Որպէս պատւոյ հիւրեր՝ ներկայ էին՝ հանրապետութեան նախագահի կրօնական փոքրամասնութիւնների հարցերով խորհրդական հոջ. Իւնեսին եւ այաթ. Թասխիրին, որոնցից իւրաքանչիւրն իր հերթին արտայայտւեց օրւայ առթիւ։
Նշենք, որ պրն. Իւնեսին իր խօսքում երբ անդրադարձաւ փոքրամասնութեանց հետ համագործակցութեան կարեւորութեանը՝ յատուկ կերպով շեշտեց հայ համայնքի Իրանում ունեցած կենսական դերի մասին ու նաեւ կարեւորութեամբ անդրադարձաւ «Ալիք» օրաթերթին՝ որպէս հնագոյն գործող օրաթերթերից մէկը եւ նրա ունեցած մշակոյթի տարածման եւ օժանդակման առումով գնահատելի ու ազդու գործունէութեան եւ առաքելութեան մասին՝ յայտարարելով, որ հարկ է օժանդակել «Ալիք»-ին՝ որպէս աշխարհասփիւռ օրաթերթ, որը կարող է շատ ազդեցիկ դերակատարութիւն ունենալ կրօնների երկխօսութեան պատգամը տարածելու մէջ։ Նա շեշտադրեց նաեւ «Արարատ» կազմակերպութեան ֆուտբոլի խմբի վերաշխուժացման եւ փոքրամասնութիւնների անձնական իրաւունքների ամրագրման հարցերը։
Ողջոյնի խօսքով հանդէս եկաւ Թեհրանի հայոց թեմի առաջնորդ Տ. Սեպուհ արք. Սարգսեանը, որը նախ ջերմօրէն ողջունեց բոլորին, ապա կարեւորեց համագումարի թեման եւ շեշտեց երկխօսութեան անհրաժեշտութիւնը՝ կրօնների դէմ ծառացած երեւոյթները յաղթահարելու հարցերը։
Դասախօսութիւնների աւարտին հարց-պատասխանի յատուկ բաժին էր նկատի առնւել, որից յետոյ առաջին օրւայ ծրագիրը փակւած յայտարարւեց։