Աղբիւր՝ www.alikonline.ir

«Այսօր իրանահայութիւնը երկրի անվտանգութեան հարցում կարծես թէ աւելի բծախնդիր է, քան այլ համայնքները կարող էին լինել...»,- այսօրինակ խօսքերով էր, որ երէկ կատարած այցի ժամանակ, Սրբազան Հօրը դիմեց Իրանի Իսլ. խորհրդարանի Անվտանգութեան եւ արտաքին քաղաքականութեան յանձնաժողովի նախագահ՝ Բորուջերդին:

Բորուջերդիի հետ հանդիպումը, որը տեղի ունեցաւ Թեհրանի հայոց թեմի առաջնորդարանի դահլիճում, Թ. Հ. Թ. առաջնորդ Տ. Սեպուհ արք. Սարգսեանին ընկերակցում էին Իսլ. խորհրդարանում իրանահայութեան զոյգ պատգամաւորները, Թ. Հ. Թ. Թեմական խորհրդի եւ Պատգամաւորական ժողովի անդամներ, Հայոց Ցեղասպանութեան 100-ամեակի Թ. Հ. Թ. յանձնախմբի, Թեհրանի Հայ Դատի յանձնախմբի, «Ալիք» հաստատութեան եւ օրաթերթի, ինչպէս նաեւ ազգային մարմինների ներկայացուցիչներ:

Սրբազան Հայրը բարձրաստիճան հիւրին յայտնելով իր երախտագիտութիւնը կապւած Երեւանում կայացած «Աշխարհն առանց ցեղասպանութիւնների» համագումարին Իրանի ներկայացուցչի մասնակցութեանը, ընդգծեց, որ ցեղասպանութեան ժամանակ, Իրանի ժողովուրդը եւս իր անժխտելի լուման ունեցաւ հայերին ապաստան տալու եւ օգնութեան ձեռք մեկնելու գործում:

Նա յաւելեց նաեւ, որ, եթէ այսօր Արեւմուտքը ազդւած հակաիրանական քարոզչամեքենայից փորձում է մեր երկրի առաջխաղացումը դիտել՝ «սեւ ակնոցներով», ապա սա նշանակում է, որ բոլորս դեռ շատ անելիքներ ունենք Արեւմուտքի աչքերը բաց անելու ուղղութեամբ:

Դոկտ. Կարէն Խանլարեանն իր հերթին մատնանշելով տարածաշրջանում թեւ առնող ծայրայեղական հակումներով խմբաւորումների ի յայտ գալը, այն համարեց որպէս նոյն Օսմանական Թուրքիայի անցեալի ձեռագիրը կրող երեւոյթ:

Բորուջերդին նոյնպէս անդրադառնալով այդ խնդրին, նշեց, որ որեւէ ժողովրդի դէմ գործադրւող հալածանքները, ճնշումներն ու սպանդը անընդունելի է եւ դատապարտելի:

Խորհրդարանում Անվտանգութեան յանձնաժողովի նախագահը ծանրանալով իրանահայութեան ստանձնած դերի կարեւորութեան վրայ, յիշատակեց այն փաստը, որ Իրան-Իրաք պարտադրեալ պատերազմի ժամանակ առաջին գծում կռւող հայ տղաների կողքին քիչ չէին նաեւ իրանահայ արհեստաւորները, ովքեր կամաւորական ջոկատներով մեկնում էին դիրքերի թիկունք եւ անցնում՝ շարքից դուրս եկած տեխնիկաների վերանորոգման առանցքային գործին:

Բորուջերդին յաւելեց նաեւ, որ անվտանգութեան հարցում, երբեմն մտածում ես, որ իրանահայերը աւելի բծախնդիր մօտեցումներ ունեն, քան որեւէ այլ մէկը կարող էր ունենալ:

Հանդիպման աւարտին կողմերը յուշանւէրների փոխանակումից յետոյ, Սրբազան Հօր ուղեկցութեամբ, այցելեցին Հայոց Ցեղասպանութեան զոհերի յիշատակը յաւերժացնող յուշարձան, որի խորհրդաւոր շնչով էլ աւարտւեց հանդիպումը: