Աղբիւր՝ www.alikonline.ir

«Վերջին 24 տարւայ ընթացքում Իրանն իր հարեւանների միջեւ Հայաստանի հետ ունեցել է լաւագոյն յարաբերութիւնները»,- այդ մասին յայտարարել է ՀՀ-ում ԻԻՀ դեսպան Մոհամմադ Ռէիսին:

Դեսպան Ռէիսին «Արմենիա» հեռուստաընկերութեան «Ռէւոլուցիա» հաղորդաշարի հետ ունեցած հարցազրոյցում, անդրադառնալով հայ-իրանական տնտեսական յարաբերութիւնների հեռանկարին, մասնաւորապէս նշել է. «Հայ-իրանական յարաբերութիւններն ՀՀ անկախութիւնից ի վեր փոփոխութեան չեն ենթարկւել, մենք շատ լաւ յարաբերութիւններ ունենք: Թէեւ Իրանի նկատմամբ շատ խիստ պատժամիջոցներ են կիրառւել, սակայն Հայաստանի հետ յարաբերութիւններում որեւէ փոփոխութիւն տեղի չի ունեցել:

Պէտք է վստահ լինէք, որ տնտեսական պատժամիջոցների վերացումից յետոյ այն խնդիրները, որոնք գոյութիւն ունէին տնտեսական յարաբերութիւններում, կը վերանան եւ մենք կեանքի կը կոչենք Հայաստանի հետ ձեռք բերւած մեր բոլոր պայմանաւորւածութիւնները, յատկապէս Հայաստանի դէպքում, որի հետ մենք ունենք յատուկ յարաբերութիւններ»:

Անդրադառնալով Հայաստանի տարածքով իրանական գազի արտահանման հաւանականութեանը, Իրանի դեսպանը մասնաւորապէս նշել է. «Իրանն աշխարհում ունի գազի ամենամեծ պաշարները. բնական է, որ Իրանն իր գազն արտահանելու համար պէտք է փնտրի նոր շուկաներ: Իրանական գազը Եւրոպա արտահանելու վերաբերեալ դեռեւս խօսակցութիւն չի եղել, սակայն եթէ նման քննարկումներ լինեն, ապա որպէս կարճ, ապահով եւ տնտեսապէս ձեռնտու ուղղութիւն կարող է քննարկւել նաեւ Հայաստանի տարբերակը»:

Այն հարցին, թէ գազի ոլորտում Հայաստանի եւ Ռուսաստանի միջեւ կնքւած համաձայնագիրը կարո՞ղ է խոչընդոտել հայ-իրանական էներգետիկ նախագծերին, դեսպան Ռէիսին պատասխանել է. «Իրանի եւ Հայաստանի միջեւ կնքւել է պայմանագիր 20 տարի ժամկէտով. հաշւի առնելով Հայաստանի եւ Ռուսաստանի միջեւ ստորագրւած համաձայնագիրը՝ Հայաստանի եւ Իրանի միջեւ կնքւած պայմանագիրը փոփոխութեան չի ենթարկւում, այն պահպանւում է»: