Աղբիւր՝ www.armenian.irib.ir

«Կեանքի դասեր տալով ողջ մարդկութեանը Յիսուս Քրիստոսը մարդկանց սովորեցրեց միմեանց նկատմամբ լինել բարի ու հոգատար»,- ասել է Ի.Ի.Հ.-ի նախագահ՝ Հասան Ռոհանին:

Նոր տարուայ սեմին այցելելով Թեհրանում գտնուող «Ս. Մարիամ» տարեցների հանգստեան տուն եւ հանդիպելով տարեցների հետ, Ի.Ի.Հ.-ի նախագահ՝ Հասան Ռոհանին նշել է. «Նրանք ովքեր ծառայում են ժողովրդին, յատկապէս տարեցներին, որոնք հովանաւորութեան աւելի մեծ կարիք ունեն, յարգուած ու արժէքաւոր մարդիկ են»:

Նշելով, որ Յիսուս Քրիստոսի ծնունդը, ներկայութիւնը եւ վերադարձը մարդկութեան համար բարութեան ակունք հանդիսանալու ճշմարտութեանը հաւատալը Իսլամի ու Քրիստոնէութեան ընդհանրութիւնն է, եւ անդրադառնալով Ս. Ղուրանում արձանագրուած Յիսուս Քրիստոսի վեհ դիրքին, Ի.Ի.Հ.-ի նախագահը ասել է. «Ս. Ղուրանում Ս. Մարիամի անունով սուրայ կայ, որում Ս. Մարիամը համարւում է մարդկութեան պատմութեան վեհ կանանցից, ով լոյս ու բարութիւն է, ով պէտք է օրինակ հանդիսանայ ողջ մարդկութեան համար»:

Շնորհաւորելով աշխարհի եւ Իրանի բոլոր քրիստոնեաներին, նոր տարեմուտի կապակցութեամբ, Ռոհանին յաւելել է. «Ոմանք սխալմամբ կարծում են, որ Փրկչական նոր տարին արեւմուտքին վէաբերող հարց է եւ կրօնական բոյր ու երանգ չունի, բայց աշխարհի երեք կարեւոր թուականները, այսինքն Փրկչական, լուսնային հիջրեթի եւ արգեկնային հիջրեթի թուականները կրօնական բնոյթ ունեն»:

Ընդգծելով որ Իրանի ողջ ժողովուրդը պէտք է ջանքեր գործադրի իր երկրի վեհութեան ու արժանապատուութեան ուղղութեամբ Ռոհանին յստակեցրել է,- «Բոլոր իրանցիները անկախ կրօնից ու դաւանանքից այս ընդհանուր նպատակն են հետապնդում»: