Աղբիւր՝ www.asbarez.com

Տիգրանակերտի քաղաքապետարանի աջակցութեամբ, «Ահմեդ Սանաթ» պատկերասրահում կազմակերպւել է «Այլեւս երբէք. անցեալի հետ առերեսում եւ ներողութիւն» խորագրով ցուցահանդէս, «Անատոլիայի մշակոյթի եւ բաց հասարակութեան հիմնարկ»-ի կազմակերպութեամբ:

Ցուցահանդէսին ներկայացւել են ժողովուրդների տեղահանութեան, կոտորածի, ցեղասպանութեան, իրաւունքների ոտնահարման եւ առհասարակ մարդկութեան դէմ ուղղւած յանցագործութիւնների մի քանի դէպքեր, ինչպէս նաեւ նրանց հետ առերեսւած եւ ներողութիւն խնդրած պետութիւնների քայլերը:

Լուսանկարների եւ տեսանիւթերի միջոցով ցոյց են տրւել Միացեալ նահանգների, Գերմանիայի, Ֆրանսիայի, Բրիատանիայի, Աւստրալիայի, Չիլիի, Սերպիայի եւ Բուլգարիայի հետ կապւած դէպքերն եւ ժողովրդավարական մշակոյթի ձեւաւորման ընթացքը:

Տիգրանակերտի քաղաքապետարանի աշխատակից Ֆըրաթ Անլը նշել է, որ ներողութիւն խնդրելը, անցեալի հետ առերեսւելը եւ հաշւի նստելը յոյժ կարեւոր են Թուրքիայի համար:

«Մենք, իբրեւ բռնութիւնների եւ հալածանքների ենթարկւած ժողովուրդներ, սպասում ենք պետութեան ղեկավաների ներողութեանը: Սպասում ենք առնւազն խղճի խայթի մի նշան, որ վստահութիւն ներշնչի»,- ասել է Անլը, ըստ «imc TV» կայանի: Նա նշել է, որ Հայոց ցեղասպանութեան մէկդարեայ տարելիցին, իրենք եւս պէտք է առերեսւեն իրենց սեփական խղճի հետ, եւ ներողութիւն խնդրեն այդ տարածքներում ցեղասպանութեան ենթարկւած ժողովուրդներից, գլխաւորապէս՝ հայերից, քանի որ իրենք եւս իրենց պատասխանատու են զգում: