Աղբիւր՝ www.yerakouyn.com

Ռուսական լրատւութիւնը հեղեղւած է Քեսաբի մասին սուտ տեղեկութիւններով, իսկ Հայաստանի որոշ լրատւամիջոցներ եւ հասարակական կայքերի օգտատէրեր շատ արագ տարածում են այդ բոլորը՝ առանց մտածելու, որ այն կարող է վնաս հասցնել նոյն քեսաբցուն եւ ընդհանրապէս հայութեանը։

Աբխազի դէմքով զինւորների նկարի տակ գրւում է՝ 1500 կռւող Արցախից գնացել են Քեսաբ, 300 կռւող՝ գաղտնի բանակից. իսկ գիտէ՞ք Հայաստանի համար դա ինչ թիւ է։ Ոմն Կարօ Գատեհճեանի հետ հարցազրոյցի տեսքով տրւում են բոլորովին անհիմն ու սարսափելի սուտ տեղեկութիւններ, տեղադրւում են կեղծ տեղեկութիւններով տեսանիւթեր, շատ յաճախ գերնպատակը rating-ի ապահովումն ու զարմացնելն է։ Գիտակցեցէ՛ք վերջապէս ձեր ճղճիմ նպատակներն իրականացնելու հետեւանքների վտանգը եւ մի՛ տարածէք սուտը...

Ինչո՞ւ ռուսական լրատւամիջոցները պիտի լինեն Քեսաբ հայաւանի մասին տեղեկութիւններ ստանալու միջոց, միթէ՞ դժւար է կապւել տեղի համայնքի հետ եւ իմանալ իրականութիւնը:

Դարձեալ յայտարարում ենք, որ առ այժմ տեղեկութիւն չկայ մօտ 16 քեսաբցիից, հաւաստի տեղեկութիւններով` զինեալները Մուսալեռ են տեղափոխել Թիթիզեան երկու քոյրերին եւ գրող Նիզար Խալիլին, նրանց որեւէ նեղութիւն չի տրւել, պարազապէս նրանց ապաստան է տրւել Մուսալեռան Վագըֆ գիւղի մէջ։ Առ այսօր այս դէպքերի ընթացքում որեւէ քեսաբցի չէ սպանւել, որեւէ մէկը մարմնական վնասներ չի կրել։ Առ այսօր իրագործւել է միայն տեղահանում եւ կողոպուտ, ուրիշ ոչինչ` այսինքն մնացած բոլոր լուրերը սուտ են…

Չորս օր յետոյ Հայաստանն սկսեց հետաքրքրւել Քեսաբով եւ ըստ երեւոյթին շատերի համար այս դէպքերը ոչ թէ մտահոգութիւն են կամ ցաւ, այլ ճղճիմ նպատակներ իրականացնելու միջոց: