Աղբիւր՝ www.yerakouyn.com

Ստամբուլի հանրապետական դատախազութիւնը հետաքննութիւն է սկսել Հրանդ Դինքի գործը լուսաբանած մի շարք լրատւամիջոցների նկատմամբ: Ինչպէս հաղորդում է «Արմէնփրես»-ը` վկայակոչելով հայկական «Ակօս» պարբերականը, այդ լրատւամիջոցների շարքին են՝ «Ակօս», «Միլլիէթ», «Վաթանէ, «Ռադիքալ», «Սթար», «Այդընլըք», «Փոսթա» պարբերականները, «Տողան» լրատւական գործակալութիւնը եւ internethaber.net կայքը:

Հետաքննութիւն սկսելու պատճառը Ստամբուլի անվտանգութեան վարչութեան ներկայացրած դատական հայցն է: Վարչութիւնը մեղադրել է լրատւամիջոցներին 2013 թւականի սեպտեմբերի 17-ին Հրանդ Դինքի սպանութեան դատավարութիւնը «սխալ լուսաբանելու» մէջ: Մասնաւորապէս, մեղադրականում նշւել է, որ այդ օրւայ լուրերում եղել են «զրպարտութիւն, արդար դատավարութեան վրայ ազդելու փորձ, պետութեան անվտանգութեան կառոյցի հրապարակաւ նւաստացում»:

Ստամբուլի Ծանր յանցագործութիւնները քննող 14-րդ դատարանմում սեպտեմբերի 17-ին Հրանդ Դինքի սպանութեան վերսկսւած դատավարութեան առաջին նիստի ժամանակ որոշում էր կայացւել կրկին ձերբակալել Դինքի սպանութեան մասնակցելու մէջ մեղադրւող Էրհան Թուճջելը: Դատական նիստին ներկայ են եղել ցմահ ազատազրկւած Եասին Հայալը, ազատութեան մէջ գտնւող կասկածեալ Հացը Սալիհօղլուն: Դատարանն ընդունել է բոլոր կողմերի ներկայացրած փաստաթղթերը` Թուրքիոյ վճռաբեկ դատարանի կողմից 17 յունւարի 2012-ին ընդունւած վճռի կէտը բեկանելու վերաբերեալ վերջնական որոշում կայացնելու համար:

Հրանդ Դինքը թրքական ազգայնական շրջանակների կողմից սպանւել է 2007 թւականի յունւարի 19-ին` «Ակօս» թերթի խմբագրատան առջեւ: Նրա յուղարկաւորութեան օրը հարիւր հազարաւոր մարդիկ դուրս են եկել Ստամբուլի փողոցներ` «Մենք բոլորս հայ ենք», «Մենք բոլորս Հրանդ ենք» կարգախօսներով: 17 յունւար 2012-ին Ստամբուլի 13-րդ ծանր յանցագործութիւնների դատարանը Դինքի սպանութեան գործով Եասին Հայալին մեղաւոր է ճանաչել՝ յանցագործութիւնը ծրագրելու եւ ուղղորդելու մէջ եւ ցմահ ազատազրկման դատապարել: Օկիւն Սամասթն սպանութիւն իրագործելու պահին անչափահաս լինելու հիմնաւորումով դատապարտւել է 22,5 տարւայ ազատազրկման: Դատարանը որոշել էր, որ սպանութիւնը կազմակերպւած յանցագործութիւն չէ եւ հանել էր ահաբեկչական կազմակերպութեան անդամ լինելու մէջ կասկածւող 19 անձերի ներկայացւած մեղադրանքները: Հրանդ Դինքի ընտանիքի փաստաբանները բողոքարկել էին թրքական դատարանի կայացրած ամօթալի վճիռի դէմ, որի արդիւնքով Թուրքիայի Վճռաբեկ դատարանը 15 մայիս 2013-ին բեկանել է Ստամբուլի 14-րդ ծանր յանցագործութիւնների դատարանի 2012 թւականի յունւարի 17-ին ընդունած վճռի այն կէտը, որտեղ նշւում է, որ Հրանդ Դինքի սպանութեան ետեւում «զինւած ահաբեկչական կազմակերպութիւն» չի կանգնել: Թուրքիայի Վճռաբեկ դատարանի 9-րդ քրէական վարչութիւնը Հրանդ Դինքի սպանութեան գործով բողոքարկման վերաբերեալ հրապարակած վճռում նշել է, որ գործով անցնող մեղադրեալները ոչ թէ «զինւած ահաբեկչական խմբաւորման», այլ «յանցագործութիւն կատարելու նպատակով ստեղծւած» կազմակերպութեան անդամներ են: