Աղբիւր՝ www.yerkir.am

Քրդամէտ ժողովուրդների դեմոկրատական կուսակցութիւնից (HDP-ԺԴԿ) ընտրւած  հայ պատգամաւոր Կարօ Փայլանը Թուրքիայի վարչապետ Բինալի Յըլդըրըմին ուղղւած գրաւոր հարցապնդում է ներկայացրել մէջլիս, որում հետաքրքրւել է, թէ կառավարութիւնն ինչ միջոցներ է ձեռնարկում` կանխելու համար փոքրամասնութիւններին ուղղւած ատելութեան դրսեւորումները. տեղեկացնում է Ermenihaber-ը:

Փայլանը հարցապնդման մէջ նախ յիշեցրել է վերջին շրջանում տեղի ունեցած դրսեւորումները, որոնցից ամենաքննարկւածը Ստամբուլում գործող «Ակօս» հայկական թերթի խմբագրատան առաջ ազգայնականների կողմից սեւ «ծաղկեպսակներ» տեղադրելու դէպքն էր:

Հայ պատգամաւորը շեշտել է, որ իրենց ֆէյսբուքեան էջում նշեալ գործողութեան լուսանկարները զետեղած եւ «Մի գիշեր անսպասելի կերպով կը գանք» գրութիւնը թողած «Ազգայնական Թուրքիա» կուսակցութեան Ստամբուլի գրասենեակի  նախագահ Բիլալ Գեօքչեյուրթի եւ «Թուրանի օջախներ» կազմակերպութեան նախագահ Էրջան Ուրչարի նկատմամբ դատական գործ էր յարուցւել, սակայն նրանք արդարացւել են դատարանի կողմից:

Փայլանն շեշտել է նաեւ, որ վերջին մէկ տարւայ ընթացքում 3 անգամ հայկական դպրոցների պատերին ռասիստական բնոյթի գրութիւններ են արւել:  Հայ օրէնսդիրը չի մոռացել նաեւ այս տարի Հաթայ նահանգում հրէական գերազմանատան ու Ադըյամանում ասորական գերեզմանատան պղծումն ու աւերումը:

Վերը թւարկածից յետոյ Փայլանը Թուրքիայի կառավարութեան ղեկավարին ուղղել է հետեւեալ 3 հարցերը`

1. Ձեր կառավարութիւնը աշխատանք տանո՞ւմ է փոքրամասնութիւնների նկատմամբ ատելութեան հողի վրայ կատարւող ու անպատիժ մնացող յանցագործութիւնները կանխելու ուղղութեամբ:

2. Արդեօ՞ք կառավարութիւնը վտանգի տակ գտնւող փոքրամասնութիւնների հիմնարկութիւնները կամ շինութիւնները պաշտպանելու նպատակով յատուկ միջոցներ է ձեռք առնում:

3. Ազգային հետախուզական ծառայութիւնը փոքրամասնութիւնների նկատմամբ ատելութեան դրդապատճառներով կատարւած յանցագործութիւնների վերաբերեալ որեւէ հետաքննութիւն իրականացնո՞ւմ է: