Աղբիւր՝ www.yerkir.am

Թուրքիայի Ժողովրդա-հանրապետական կուսակցութիւնից հայ պատգամաւոր Սելինա Դողանը հարցազրոյց է տուել Sozcu պարբերականի լրագրող Նիլ Սոյսալին:

Ըստ T24-ի՝ Դողանը խոստացել է պայքարել ատելութեան դրսեւորումների դէմ: Նշելով, որ երբեք չի ներելու նախագահ Թայիփ Էրդողանին, հայ պատգամաւորը խոստացել է Էրդողանի հետ առաջին իսկ հանդիպմանը ասել. «Ներողութիւն, բայց ես հայ եմ»: (Էրդողանն իր ելոյթում «հայ» բառն արտասանելիս ներողութիւն էր խնդրել):

Ստորեւ ներկայացնում ենք հարցազրոյցը

- Դուք խորհրդարան մտաք՝ որպէս առաջին հայ կին պատգամաւոր: Միաժամանակ, Մէջլիսի ամենաերիտասարդ պատգամաւորներից մէկն էք, այդպէս չէ՞:

- Պատգամաւոր ընտրուելիս հետաքրքրուեցի՝ արդեօք ե՞ս եմ ամենաերիտասարդը: Ժողովուրդների դեմոկրատական կուսակցութեան շարքերում աւելի երիտասարդ պատգամաւորներ կան: Այդ իսկ պատճառով ամենաերիտասարդ պատգամաւորի կոչումն ինձ չի պատկանում:

- Դուք փաստաբան էք: Մի՞շտ էք մօտ եղել քաղաքականութեանը:

- Եթէ, քաղաքականութիւն ասելով, նկատի ունէք հանրութեան մի շարք խնդիրների լուծման համար «ձեռքը քարի տակ դնելը», ապա, որեւէ կուսակցութեան հետ կապ չունենալով, միշտ եղել զգայուն եմ եղել թէ' սոցիալական խնդիրների, թէ' սոցիալական պատասխանատուութեան նախագծերի եւ յատկապէս` համայնքի հարցերում: Հայ համայնքում հայ ֆեմինիստ կանանց վերաբերող ծրագրերում միշտ ակտիւ գործունէութիւն եմ ծաւալել: Բացի այդ` Եւրոպայի խորհրդում, ՄԱԿ-ում ազգային փոքրամասնութիւնների եւ հասարակական կազմակերպութիւնների մասին դասընթացների եմ մասնակցել: Կարճ ասած՝ երբեք հեռու չեմ եղել քաղաքական հարցերից: Հայրս էլ աւելի քան 30 տարի ԺՀԿ-ում քաղաքականութեամբ է զբաղուել, բնականաբար, ես մեծացել եմ սոցիալ-դեմոկրատական ընտանիքում:

- Դուք Մէջլիս մտաք դժուար ժամանակահատուածում: Ին՞չ հեռանկար ունէք, հնարաւո՞ր է լինելու ստեղծել կոալիցիոն կառավարութիւն:

- Իսկապէս շատ դժուար ժամանակների ենք անցնում, սակայն, միւս կողմից, բազմակարծիք ժողովրդավարութեան համար բաւարար համարուող ընտրութիւններ կայացան: Ես հաւատում եմ, որ այս տանիքի ներքոյ կառավարութիւն է ձեւաւորուելու: Մենք՝ որպէս  Ժողովրդայ-հանրապետական կուսակցութիւն, մեր առջեւ դրեցինք մեր առաջնահերթութիւններն ու քաղաքական պատասխանատուութեամբ առաջ ենք շարժւում: Մենք լաւ գիտակցում ենք, որ աւերակներ ենք ստանձնել, հետեւաբար, սկսելու ենք ոչ թէ զրոյից, այլ մինուսից:

- Ձեր առաջնահերթութիւնը Մէջլիսում ո՞րն է լինելու:

- Ես առաջինը պայքարելու եմ խօսքի ազատութեան համար: Պայքարելու եմ ատելութեան ելոյթների դէմ: Որպէս ֆեմինիստ՝ իմ օրակարգի կէտերում են լինելու նաեւ կանանց վերաբերող հարցերը: Մենք, դժբախտաբար, ապրում ենք մի երկրում, ուր կինը չունի ապրելու իրաւունք: Կարծում եմ՝ ոչ միայն կանայք, այլեւ տղամարդիկ էլ այդ ուղղութեամբ շատ բան ունեն անելու: Մենք նաեւ պայքարելու ենք խտրականութեան դէմ: Ազգային փոքրամասնութիւնների վերաբերեալ հարցում ոչ միայն հայերի համար եմ աշխատանքներ կատարելու, քանի որ ալեւիներն էլ, քրդերն էլ, գնչուներն էլ ու սեռական տարբեր ինքնութիւն ունեցողներն էլ իրենց բաժինը ստանում են: Սակայն ոչ մուսուլման փոքրամասնութիւնների մասին կարող եմ ասել, որ շատ լուրջ խնդիրներ ունենք, ինչը կախում ունի ատելութեան ելոյթներից: Մեզ թշնամացնում են: Ոչ մի կերպ հնարաւոր չէր կեանքի կոչել «հաւասար քաղաքացիութիւն» հասկացութիւնը, քանի որ հայերին, յոյներին, հրէաներին որպէս հայհոյանք էին ընկալում:

- Ներելու՞ էք նախագահ Էրդողանի՝ «ներողութիւն, ինձ հայ էլ ասացին» խօսքը:

- Էրդողանի հետ դեռեւս չեմ հանդիպել, բայց առաջին իսկ հանդիպման ժամանակ մտածում եմ նրան ասել՝ ներողութիւն, բայց ես հայ եմ: Ես Էրդողանին այդ խօսքերի համար երբեք չեմ ներելու:

- Դուք Ձեզ որպէս թուրքահպատակ հայ էք ներկայացնում: Ինչու՞ ոչ թուրք հայ, այլ թուրքահպատակ հայ:

- Նախ` ես հայ եմ, բայց քանի որ Թուրքիայի Հանրապետութեան քաղաքացի եմ, ասում եմ՝ թուրքահպատակ հայ:

- Ընտրարշաւի ժամանակ Ձեզ մեղադրեցին Ցեղասպանութեան մասին քարոզչութիւն իրականացնելու մէջ: «Յատկանշական է, որ իմ թեկնածութիւնն համընկաւ Ցեղասպանութեան տարելիցի 100-ամեայ տարելիցի հետ» ասացի՞ք, թէ՞ ոչ:

- Իմ՝ ինչ-որ բան ասելն ու չասելը ոչինչ չի փոխում: Ոչ մի ազգ, ոչ մի ռասայ, ոչ մի կրօն բարձր չէ միւսից: Այդ պատճառով էլ, կարծում եմ, այս քննարկումը շատ մակերեսային է...