Աղբիւր՝ www.asbarez.com

Նորվեկիոյ մայրաքաղաք Օսլոյի մէջ կայացած Եւրոմիութեան Մշակութային ժառանգութեան մրցանակաբաշխութեան հանդիսաւոր արարողութեան ընթացքին Տիգրանակերտի Սուրբ Կիրակոս հայկական եկեղեցւոյ շնորհուած է 7 գլխաւոր մրցանակներէն մէկը:

Թրքական «turkiyeturizm.com» կայքը կը հաղորդէ, որ մրցանակաբաշխութեան դատակազմի անդամներուն այս որոշման համար հիմնական դրդապատճառը հանդիսացած է կիսաւեր եկեղեցւոյ վերականգնման ջանքերուն մէջ հայ համայնքի եւ տեղւոյն բնակչութեան, ինչպէս նաեւ տեղական իշխանութեանց միջեւ համագործակցութիւնը, որ նկատուած է համերաշխութեան լաւ օրինակ:

Մրցանակաբաշխութեան ներկայացուած են բազմաթիւ մշակութային նախագիծեր, որոնց ուսումնասիրութիւններուն մասնակցած են աշխարհի տարբեր երկիրներէ մշակութային ժառանգութեան 600 մասնագէտ եւ բազմաթիւ կամաւորներ: Մասնագէտները մրցանակներուն համար քննած էին աւարտական հանգրուան հասած 28 կառոյցներ։

Մրցանակին կ'ընկերանար 10,000 եուրոյի նիւթական վարձատրութիւն։

Միջոցառման իրենց մասնակցութիւնը բերած են նաեւ Օսլոյի քաղաքապետն ու Նորվեկիոյ բնապահպանութեան նախարարը: