Կիրակի՝ յունւարի 12-ի առաւօտեան, Նոր Ջուղայի «Ս. Յովհաննու Կարապետ» եկեղեցում մատուցւած Սուրբ եւ Անմահ Պատարագի ընթացքում, քարոզախօսութեան պահին, Սպահանի հայոց թեմի Առաջնորդ գերշ. Տ. Սիփան Ս. Արք. Քէչէճեանի միջոցով ընթերցւեց Ն.Ս.Օ.Տ.Տ. Արամ Ա. Վեհափառ Հայրապետի հռչակագիրը՝ 2025 թւականը «Աւանդութիւնների վերակենսաւորման տարի» անւանելու կապակցութեամբ:
Հռչակագրի աւարտին Վեհափառ Հայրապետը թելադրել էր.
ա. Աւանդութեան կարեւորութիւնը շեշտող յօդւածներ գրւեն հոգեւոր հայրերի ու մտաւորականների կողմից:
բ. Մատչելի եւ դաստիարակչական մօտեցումով յատուկ գրքոյկներ պատրաստւեն՝ աւանդութիւնների ծնունդը, հոլովոյթն ու նպատակը պարզող:
գ. Հոգեւոր հայրերը, թէ՛ իրենց քարոզների եւ թէ՛ ընտանիքներին տւած այցելութիւնների ընթացքում, յիշեցնեն մեր աւանդութիւնների ներկայացրած իւրայատո՛ւկ կարեւորութիւնը:
դ. Մեր կառոյցները, յատկապէս տիկնանց միութիւնները, ժողովրդային յատուկ հաւաքներ կազմակերպեն՝ աւանդութիւններ բացատրող եւ նրանց դերն ու այժմէականութիւնը պարզող:
Պատարագից յետոյ Սրբազան Հօր նախագահութեամբ տեղի ունեցաւ Ջրօրհնէք, իսկ եկեղեցու սրահում իրականացւեց միջոցառում՝ «Ս. Յովհաննու Կարապետ» եկեղեցու անւանակոչութեան առթիւ:
Նշելի է, որ Վեհափառ Հայրապետի հռչակագիրն ընթերցւել է նաեւ Շահինշահրի «Սրբոց Վարդանանց» եկեղեցում մատուցւած կիրակնօրեայ Սուրբ եւ Անմահ Պատարագի ընթացքում՝ արժ. Տ. Սահակ քհնյ. Մինասեանի միջոցով:
Թղթակից (Նոր Ջուղա)
