Չորեքշաբթի՝ յունիսի 5-ի առաւօտեան, Սպահանի Հայոց Թեմի պատւիրակութիւնը, գլխաւորութեամբ թեմակալ առաջնորդ գերշ. Տ. Բաբգէն եպս. Չարեանի, եւ ներկայութեամբ արժն. Տ. Մեսրոպ աւ. քհնյ. Գալստանեանի, Իրանի Իսլ. Խորհրդարանում հիւսիսային իրանահայութեան նախկին պատգամաւոր Վարդան Վարդանեանի, Պատգամաւորական Ժողովի եւ Թեմական ու Կրօնական խորհուրդների ներկայացուցիչների, մասնակցելով Սպահանի Սէյէդ մզկիթում տեղի ունեցած Սպահանի նախկին ուրբաթօրեայ աղօթապետ այաթ. Թահերիի թաղման յաջորդ օրւայ հոգեհանգստեան արարողութեանը՝ իր յարգանքի տուրքը մատուցեց 87-ամեայ հոգեւորականի յիշատակին: Բազմամարդ այս արարողութեանը ներկայ էին նաեւ երկրի նախկին եւ ներկայ նախարարներից, խորհրդարանի պատգամաւորներից, Սպահանի նահանգապետ Զաքեր Էսֆահանին եւ մի շարք այլ բարձրաստիճան պաշտօնեաներ: 

Այաթ. Սէյէդ Ջալալէդդին Թահերին Իրանի Իսլամական Յեղափոխութիւնից յետոյ եղել է Սպահանի առաջին ուրբաթօրեայ աղօթապետը եւ սոյն պարտականութիւնը շարունակել է մինչեւ իրանական 1381 թւականը, երբ հրաժարւել է նշւած պաշտօնից: Նա իր պաշտօնավարութեան ամբողջ ընթացքում եւ դրանից յետոյ միշտ սերտ յարաբերութիւններ է պահպանել իրանահայութեան, ի մասնաւորի Սպահան քաղաքի հայութեան հետ եւ մշտապէս դրւատանքով է արտայայտւել հայերի մասին: Այաթ. Թահերին իր մահկանացուն է կնքել կիրակի, յունիսի 2-ին, շնչառութեան հետ կապւած խնդիրների պատճառով:

Նորոգ հանգուցեալի յուղարկաւորութիւնը կատարւել է երեքշաբթի՝ յունիսի 4-ին: