Երեքշաբթի՝ 2013 թւականի ապրիլի 30-ի կէսօրին, Սպահանի 5-րդ շրջանի քաղաքապետ պրն. Ասառզադեգանի կարգադրութեամբ եւ գլխաւորութեամբ, իրանական կնոջ օրւայ առթիւ, Ս. Ամենափրկչեան Վանք այցելեց 5-րդ շրջանի քաղաքապետարանի իգական սեռի ամբողջ աշխատակազմը: Խումբը Ս. Յովսէփ Արեմաթացի եկեղեցի այցելելուց յետոյ, Առաջնորդարանի Ծաղկեայ դահլիճում հանդիպեց Սպահանի Հայոց Թեմի առաջնորդ գերշ. Տ. Բաբգէն եպս. Չարեանին: Հանդիպմանը ներկայ էին նաեւ Պատգամաւորական Ժողովի Դիւանի, Թեմական եւ Կրօնական խորհուրդների ատենապետեր պրնյք. Վարուժ Մինասեանը, Նոէլ Մինասեանը, Արշալոյս Խուդավերդեանը, Թեմական Խորհրդի անդամ տկն. Քառոլին Դիլանչեանը եւ Պատգամաւորական Ժողովի Դիւանի անդամ տկն. Սեդիկ Այւազեանը:
Սկզբում առաջնորդ Սրբազան Հայրն այցելութեան առիթով ուրախութեան եւ շնորհակալական խօսքեր յայտնեց քաղաքապետի այս իւրայատուկ կարգադրութեան համար: Նա առ ի ծանօթութիւն, պատւիրակութեանը ընդհանուր գծերով բացատրութիւններ փոխանցեց Թեմի եւ Առաջնորդարանի կացութեան եւ գործունէութեան վերաբերեալ: Գերշ. Սրբազան Հայրը յանւանէ եւ զբաղեցրած իրենց պաշտօնով ու հանգամանքով ներկայացրեց հանդիպմանը ներկայ Առաջնորդարանի ներկայացուցիչներին եւ շեշտելով, որ Հայոց Առաջնորդարանի եւ ազգային այլ հաստատութիւնների պատասխանատու կազմերում ներգրաււած իգական սեռի մեծ թւով ներկայացուցիչների առկայութիւնը ապացոյցն է այն իրողութեան, որ Հայոց Եկեղեցին մեծ համարում ունի հայ կանանց ուժականութեան, կարողութիւնների եւ ընդունակութիւնների վրայ, որով լուրջ դերակատարութիւն եւ բարձր պատասխանատւութեամբ մասնակցութիւն է ապահովում նրանց համար, ովքեր ընտանեկան պարտականութիւնների կողքին լաւապէս վերահասու են լինում իրենց վստահւած ազգային բազմատեսակ աշխատանքներին: Առաջնորդ Սրբազան Հայրը ներկայ կանանց փոխանցեց իր շնորհաւորանքները՝ իրանական կնոջ օրւայ կապակցութեամբ եւ ուժ ու կորով մաղթեց նրանց:
Սպահանի 5-րդ շրջանի քաղաքապետ պրն. Ասառզադեգանը շնորհակալութիւն յայտնելով ջերմ ընդունելութեան համար, քաղաքապետարանի կին պաշտօնեաների Ս. Ամենափրկչեան Վանք այցելելու կապակցութեամբ ասաց. «Ցանկացանք կնոջ օրւայ առթիւ իւրայատուկ եւ տպաւորիչ ծրագրի մասնակից դարձնել մեր գործակիցներին, որի պատճառով ընտրեցինք Ս. Ամենափրկչեան Վանքը, համոզւած լինելով, որ այս կենտրոնին առնչւող Նոր Ջուղայի հայ համայնքը երկար դարեր համերաշխութեամբ ապրելով պարսիկ ազգի կողքին՝ լաւագոյն ապացոյց եւ օրինակն է միաստւածեան կրօնների հետեւորդների խաղաղ համակեցութեան եւ հետեւաբար՝ արդիւնաւէտ գործակցութեան»:
Թեմական Խորհրդի ատենապետ պրն. Նոէլ Մինասեանն եւս շնորհաւորանքներ փոխանցեց այցելած պատւիրակութեան անդամներին եւ վստահութիւն յայտնեց, որ քաղաքապետարանում աշխատող բոլոր կանայք ամենայն պատասխանատւութեամբ եւ լրջութեամբ են վերաբերւում իրենց յանձնւած պարտականութիւններին:
Հանդիպման աւարտին, Առաջնորդ Սրբազան Հայրը ծաղիկներ նւիրեց կանանց, ովքեր համեստ հիւրասիրութիւնից յետոյ այցելեցին «Խաչատուր Կեսարացի» անւան թանգարան եւ տպաւորւած մեկնեցին Ս.Ա. Վանքից:
