Թեմիս Թեմական խորհուրդը, իր աշխատանքային առաջին իսկ օրւանից, իր առջեւ խնդիր է դրել օժանդակել թեմապատկան բնակարաններ զբաղեցնող, թմրամիջոցներ գործածող անխնամակալ անհատներին՝ վերականգնելու իրենց առողջութիւնը, շրջակայ միջավայրը զերծ պահել այս վտանգաւոր երեւոյթի բացասական ազդեցութիւնից, ինչպէս նաեւ ընթացք տալ հարեւանների ներկայացրած բողոքներին։

Համաձայն մշակւած ծրագրի՝ թմրամոլութեամբ տառապող անհատները ուղեգրւելու են համապատասխան բուժհաստատութիւններ, որտեղ ստանալու են կախւածութիւնը յաղթահարելու մասնագիտական օգնութիւն՝ վերականգնողական բուժում եւ հոգեբանական խորհրդատւութիւն, եւ նրանց օգնութիւն է ցուցաբերւելու վերադառնալու բնականոն կեանք։

Այս ծրագրի առաջին փուլում, Սպահանի Բարեկեցութեան գերատեսչութեան եւ Սպահանի 5-րդ շրջանի Ոստիկանական բաժանմունքի անմիջական համագործակցութեամբ, խնդրոյ առարկայ չորս անհատները տեղափոխւել են «Զենդեգիէ փաք» կոչւող հաստատութիւն, որտեղ անց են կացնելու բուժման ընթացքը, իսկ Թեմական խորհրդի դիմումի համաձայն եւ Սպահանի 5-րդ շրջանի քաղաքապետարանի միջոցով, մաքրազարդւել են նրանց կացարանները։ Այս մասին Թեմական խորհուրդը տեղեակ է պահել յիշեալների հարազատներին։

Ծրագիրն իրականացւելու է մի քանի փուլերի ընթացքում։

Յատկանշելի է, որ այս գործընթացի ամբողջ ծախսը՝ ներառեալ բուժւողների կեցութեան եւ ապաքինման հետ կապւող ծախսումները, յանձն է առել Թեմական խորհուրդը։

Հանրային կապ՝ ՍՀԹ Ազգային առաջնորդարանի