2025 թւականի Ամանորի առթիւ, չորեքշաբթի՝ յունւարի 1-ի առաւօտեան, Նոր Ջուղայի Ս. Ամենափրկիչ վանքի «Ս. Յովսէփ Արիմաթացի» եկեղեցում, ձեռամբ Սպահանի հայոց թեմի Առաջնորդ գերշ. Տ. Սիփան Ս. Արք. Քէչէճեանի մատուցւեց Սուրբ եւ Անմահ Պատարագ:

Պատարագին մասնակցում էր նաեւ թեմի եկեղեցականաց դասը, իսկ երգեցողութեամբ հանդէս եկաւ Ս. Ամենափրկիչ վանքի «Կոմիտաս» երգչախումբը՝ ղեկավարութեամբ Արբի Բաբումեանի:

Ընթացքում, որպէս տարւայ առաջին օրւայ Պատարագի քարոզախօսութիւն, Սրբազան Հայրն ընթերցեց իր Ամանորեայ պատգամը, որտեղ կարեւորութեամբ ընդգծւել էր. «Այնժամ միայն կը զգանք մեր ներսում կատարւող իսկական փոփոխութիւնը, երբ նոր տարւայ նման նորոգւելու է մեր ամբողջ հոգեմտաւոր ներաշխարհը: Վստահաբար ընտրելու ենք «Նեղ Դուռ»-ն ու աստւածահաճոյ ճանապարհը, բարեգործութիւններով լցնելու ենք մեր առօրեայ կեանքը, Աստւածաշունչն ու աղօթքը լինելու են մեր մնայուն զբաղմունքները, մինչ ներումը լինելու է մեր հաշտարար միջնորդը, որովհետեւ մեր ներսում իսկական տիրողն ու գերիշխողը լինելու է Բարին եւ մենք դառնալու ենք պարզապէս իջեւաններ՝ հրեշտակային ընկերակցութեամբ»:

Արարողութեանը ներկայ էին՝ Իրանի Իսլ. խորհրդարանում Սպահանի եւ հարաւային իրանահայութեան պատգամաւոր Գեղարդ Մանսուրեանը, ազգային մարմինների ներկայացուցիչներն ու թեմիս ժողովուրդը:

Թղթակից (Նոր Ջուղա)