" https://alikonline.ir/political/24566 "
ԱԳ նախարարի ժամանակաւոր պաշտօնակատար Ալի Բաղերի Քանին կիրակի օրը շեշտել է Հայաստանի եւ Ադրբեջանի Հանրապետութիւնների միջեւ խնդիրների լուծման անհրաժեշտութիւնը՝ ընդգծելով, որ Թեհրանը եւ Մոսկւան իրենց շահերին համապատասխան պէտք է համագործակցեն Կովկասեան տարածաշրջանում։
Այս մասին ըստ ԻՌՆԱ-ի` նա յայտարարել է ՌԴ ԱԳՆ յատուկ ներկայացուցիչ Իգոր Խովայեւի հետ հանդիպմանը, որը կիրակի օրն այցով գտնւում էր Թեհրանում։
Անդրադառնալով տարածաշրջանային եւ միջազգային կարեւոր հարցերի շուրջ երկու երկրների դիրքորոշումների նմանութեանը՝ Բաղերի Քանի Կովկասեան տարածաշրջանն անւանել է երկու երկրների Ազգային Անվտանգութեան եւ շահերի ոլորտ, ընդգծելով այս առնչութեամբ երկու երկրների միջեւ համագործակցութեան անհրաժեշտութիւնը։
«Կովկասեան տարածաշրջանում ընթացիկ իրադարձութիւնների կարեւորութիւնն ու զգայունութիւնը, յատկապէս արտաքին ուժերի միջամտութեան աճի միտումը, պահանջում է ռազմավարական համակարգում եւ մշտական խորհրդակցութիւններ Իրանի եւ Ռուսաստանի պաշտօնեաների միջեւ»,- ասել է նա՝ յաւելելով, որ «այս առումով անհրաժեշտ է. առաւելագոյնս օգտագործել տարածաշրջանային մեխանիզմների ներուժը, օրինակ՝ «3+3» կառոյցը տարածաշրջանում խնդիրների լուծման, տարածաշրջանային համագործակցութեան եւ մերձեցման ընդլայնման, ինչպէս նաեւ կովկասեան տարածաշրջանի երկրների անվտանգութեան, կայունութեան եւ հաւաքական շահերի ապահովման համար»։
Իգոր Խովայեւն իր հերթին զեկոյց է ներկայացրել Կովկասեան տարածաշրջանում խաղաղութեան եւ կայունութեան հաստատմանն ուղղւած իր երկրի դիւանագիտական ջանքերի մասին, ինչպէս նաեւ ընդգծել է կովկասեան տարածաշրջանում տեղի ունեցողի նկատմամբ երկու երկրների համատեղ ռազմավարական գնահատականի վերաբերեալ Ռուսաստանի տեսակէտը։