Նոր Ջուղայի Հայոց Ազգային Կրթահամալիրի շինութիւնը համալրելու նպատակով՝ Սպահանի Հայոց Թեմի Թեմական Խորհուրդը ձեռնարկեց նոր դասարանների կառուցման աշխատանքին, որը մեկնարկեց 2013 թւականի յունիսի վերջերին եւ աւարտւեց օրեր առաջ: Սոյն դասարանները կառուցւել են Ն.Ջ. Հայոց Ազգային Կրթահամալիրի հիւսիսային բակի արեւելեան բաց տարածքում, որի արդիւնքում հիմնւել է երկյարկանի ու արդիական շէնք:

Նորակառոյց դասարանների պաշտօնական բացումը տեղի ունեցաւ երեքշաբթի՝ հոկտեմբերի 8-ի առաւօտեան ժամը 8-ին, ձեռամբ Սպահանի Հայոց Թեմի առաջնորդ գերշ. Տ. Բաբգէն եպս. Չարեանի, Թեմական եւ Կրթակալ խորհուրդների ատենապետերի:

Բացման արարողութեանը ներկայ էին՝ ազգային մարմինների ներկայացուցիչներ եւ «Արմէն» տարրական բաժնի պատասխանատուներն ու աշակերտները: 

Արարողութեան ընթացքում նախ արտայայտւեց «Արմէն» տարրական դպրոցի տեսուչ Վրէժ Շիրւանեանը, որն ամփոփ անդրադարձ ունենալով սոյն նախագծի կազմելու եւ իրագործման ընթացքին՝ տեսչութեան անունից շնորհակալութիւն յայտնեց ազգային իշխանութեանը՝ նման հնարաւորութիւն ստեղծելու համար: Այնուհետեւ ներկաներին իր խօսքն ուղղեց Թեմական Խորհրդի ատենապետ Նոէլ Մինասեանը: Նա գնահատելով նախագծի պատասխանատուին եւ շինարարական կազմին՝ կատարած աշխատանքների եւ կարճ ժամանակահատւածում երկյարկանի շինութիւնը լաւապէս կառուցելու համար, մաղթեց, որ նմանօրինակ հնարաւորութիւնների ստեղծումը կը նպաստի կրթութեան որակի բարձրացմանը եւ յոդորեց ներկայ աշակերտներին՝ իրենց աշխատանքը բազմապատկելու՝ կրթութեան մակարդակի բարելաւման ուղղութեամբ:

Բացման արարողութեան աւարտին իր հայրական պատգամը փոխանցեց առաջնորդ Սրբազան Հայրը: Նա գնահատանքի խօսք ուղղելով ազգային մարմիններին ու նախագծի պատասխանատուներին՝ կարեւորութեամբ ընդգծեց, որ Թեմի ազգային իշխանութիւնը ցանկանում է աշակերտութիւնը լաւ պայմաններում կրթւի, հայեցի դաստիարակութիւն ստանայ եւ առողջ սերունդ դառնայ: Վերջում թեմակալ առաջնորդն օրհնեց նորակառոյց շինութիւնը:

Յատկանշական է, որ սոյն արարողութիւնից յետոյ, գերշ. Տ. Բաբգէն եպս. Չարեանն այցելելով տարրական բաժնի առաջին դասարաններ՝ աշակերտութեանը տրամադրեց գունազարդ կրօնի դասագրքեր: Սրբազան Հայրն այցելեց նաեւ «Արմէն» տարրական, «Քանանեան» եւ «Կատարինեան» ուղեցոյց եւ միջնակարգ դպրոցների դասարաններ՝ մօտկից աշակերտութեան ուսման իրավիճակին ծանօթանալու նպատակով: