Չորեքշաբթի՝ 2013 թւականի փետրւարի 6-ի ճաշւայ ժամը 13:30-ին, Ս. Ամենափրկչեան Վանք այցելեցին Սպահան քաղաքի ընդհանուր քաղաքապետ պրն. Սաղայեան-Նեժադը, ընկերակցութեամբ Սպահան քաղաքի 5-րդ շրջանի քաղաքապետ պրն. Ասառզադեգանի եւ քաղաքապետարանի մի քանի բարձրաստիճան պաշտօնէութեան, ովքեր հանդիպում ունեցան Ազգ. Առաջնորդարանի պատասխանատուների հետ:
Ս. Ամենափրկչեան Վանքի Ծաղկեայ դահլիճում հիւրերին ընդունեցին թեմակալ առաջնորդ գերշ. Տ. Բաբգէն եպս. Չարեանը, Սպահանի Հայոց Թեմի Պատգամաւորական Ժողովի Դիւանի ատենապետ, Թեմական Խորհրդի ատենապետ եւ Կրօնական Խորհրդի ատենապետ պրնյք. Աշոտ Դաւթեանը, Նոէլ Մինասեանը եւ Արշալոյս Խուդավերդեանը: Ներկայ էին նաեւ Կրօնական Խորհրդի, Հաշւեքննիչ եւ Կալւածա-Տնտեսական մարմինների ներկայացուցիչները:
Գերշ. Սրբազան Հայրն իր ուրախութիւնը յայտնեց քաղաքապետերի այցելութեան առթիւ, գնահատելով նրանց շինարար եւ բեղուն գործունէութիւնը՝ Սպահան քաղաքի ծաղկման եւ գեղեցկացման ուղղութեամբ: Առաջնորդ Սրբազան Հայրը յոյս յայտնելով, որ 2013 թւականը լինելու է Իրանի եւ համայն աշխարհի մարդկութեան համար խաղաղութեան եւ առողջութեան տարի, առանձնաբար յիշեց Սիրիայում տիրող պատերազմական կացութեանը, այնտեղի ժողովրդի ծանր պայմաններին եւ նրանց դժւարութիւններին վերջ տալու անհրաժեշտութիւնն ու կենսական հրամայականը: Ապա Սպահանի եւ Իրանի բոլոր պատասխանատու անձանց եւ ժողովրդին շնորհաւորեց Իրանի Իսլամական Յեղափոխութեան 34-րդ տարեդարձի եւ իսլամ կրօնի հիմանդիր Մուհամմեդ մարգարէի ծննդեան առիթներով: Առաջնորդ Սրբազան Հայրը նշեց, որ խաղաղ եւ համերաշխ ապրելու գաղտնիքը կայանում է աստւածամերձ կեանք ապրելու եւ բարոյական ու եղբայրասիրութեան սկզբունքներին հաւատարիմ մնալու մէջ, որի համար աղօթեց Աստւած իր շնորհքները առատօրէն բաշխի մարդկութեանը, որպէսզի վերանան սատանայական բոլոր փորձանքներն ու սադրանքները մարդկային կեանքից:
Քաղաքապետ պրն. Սաղայեան-Նեժադը, երկրորդելով առաջնորդ Սրբազան Հօր խօսքերը, ինքը եւս շեշտեց, որ մարդ արարածը երբ հեռանում է աստծու պատւիրանների գործադրութիւնից եւ հաւատն առանձնացնում է իր քաղաքական կեանքից, մատնւում է սարսափելի դժւարութիւնների եւ կրում ծանրագոյն վնասներ: Նա բազմաթիւ օրինակներ բերելով մարդկային կեանքի պատմութիւնից, իր համոզումը յայտնեց, որ մարդը կարող է խաղաղ եւ երջանիկ ապրել, եթէ Աստծու նկատմամբ իր հաւատն ու վստահութիւնը շաղախի իր կեանքի բոլոր ոլորտներին: Պրն. Սաղայեան-Նեժադը իր շնորհաւորանքները փոխանցեց Ամանորի եւ Ս. Ծննդեան տօների առթիւ, մաղթելով աշխարհում Քրիստոսի աւետած խաղաղութեան եւ սիրոյ առաւել տարմածումը:
Թեմական Խորհրդի ատենապետ պրն. Նոէլ Մինասեանն եւս իր հերթին ուրախութիւն յայտնեց երկու քաղաքապետերի այցելութեան առթիւ, նաեւ յատուկ կերպով շնորհակալութիւն յայտնեց՝ Առաջնորդարանի եւ ընդհանրապէս հայկական թաղամասերի նկատմամբ քաղաքապետարանի կիրառած բարեացակամ քաղաքականութեան համար: Պրն. Մինասեանը նաեւ խնդրեց պատասխանատուներին՝ Նոր Ջուղայի հայկական կրօնական, մշակութային եւ մարզական կենտրոնների առաւել պատշաճ շինութեան եւ պահպանման գործում աւելիով նիւթա-բարոյական ներդրումներ եւ հնարարւորութիւններ յատկացւի:
Հանդիպման աւարտին, պրն. Սաղայեան-Նեժադը յուշանւէրներ յանձնեց եւ Ս.Ա. Վանքի «Խաչատուր Կեսարացի» թանգարանի առջեւ հաւաքական կերպով լուսանկարւելուց յետոյ, հրաժեշտ տւեց Ազգային Առաջնորդարանի պատասխանատուներին:
