Աղբիւր՝ www.hyeli.com
Հալէպի հայաշատ Նոր Գիւղ եւ Սուլէյմանիէ թաղամասերում յունիսի 7-ին հրասանդների եւ հրթիռների ընկնելու հետեւանքով հայ է զոհւել, այս մասին տեղեկացնում է «Արմէնպրես»-ը:
Զոհւածը 1982 թւականին ծնւած Կարօ Աստուրեանն է: Սուլէյմանիէ թաղամասում հրասանդներ ընկնելու հետեւանքով 2 հայեր են վիրաւորւել՝ Յակոբ Սեմերջեանը եւ Պայծիկ Մելքոնեան-Չերչեանը:
Տեղեկութիւններ կան, որ Պայծիկ Մելքոնեանի վիճակը մտագոհիչ չէ:
Աւելի վաղ տեղեկութիւններ էին ստացւել, որ Հալէբի հայկական Նոր Գիւղ թաղամասում յունիսի 1-3-ը հրետակոծման հետեւանքով վիրաւորւել են Մարիա Խաչերեան- Չիլինկիրեանը, Լեւոն Չերչեանը, Թալին Մինասեանը, Անի Մահսերջեանը եւ Յովսէփ Դեմիրճեանը:
Բարեբախտաբար, հայերի վիճակը մտահոգիչ չէ:
Հայկական Նոր Գիւղ թաղամասում ընկած հրթիռները մարդկային վնասներից բացի նիւթական սարսափելի վնասներ են պատճառել: Նոր Գիւղում մեծաթիւ բնակարաններ բոլորովին անբնակելի են դարձել, իսկ հարիւրաւոր բնակարաններ նորոգելու կարիք ունեն: Երբեմնի հայաշատ Նոր Գիւղ թաղամասն այսօր աղէտալի շրջան է, ամայացած ու աւերակ:
Նոր Գիւղը եւ հալէբահայութիւնը կործանման վտանգի առջեւ են կանգնել: Կոչ է ուղղւել համայն հայութեանը՝ բոլոր միջոցներով սատար կանգնելու ի նպաստ անմարդկային հրթիռաձգութեան կասեցման՝ յանուն աղէտահար ժողովրդի ֆիզիկական անվտանգութեան ապահովման: