Աղբիւր՝ www.alikonline.ir

Միջոցառում՝ ի պաշտպանութիւն քեսաբահայութեան՝ Հ.Մ.Մ. «Նայիրի» միութեան կենտրոնատեղիում

«Ցեղասպանութիւնը շարունակւում է... 1915-2014». Այս խորագրի ներքոյ էր ամփոփւած կիրակի երեկոյեան Հ.Մ.Մ. «Նայիրի» միութեան նախաձեռնութեամբ «Սուքերեան» սրահում կազմակերպւած երեկոն: Միջոցառում, որը բանախօսութեամբ ու օրւան պատշաճ արտայայտութիւններով, տեսաֆիլմով ու գեղարւեստական կատարումներով՝ մէկ անգամ եւս վեր հանեց հայ ժողովրդի դէմ Թուրքիայի իրագործած ոճրագործութիւնները:

Հարիւրաւոր ներկաների մասնակցութեամբ, լեփլեցուն դահլիճում, օրւայ հաղորդավար Արտոյտ Զոհրաբեանը իր հակիրճ բացման խօսքի ընթացքում անդրադարձաւ 1915-ից ցայսօր հայ ժողովրդի դէմ իրագործւած ոճրագործութիւններին, որից յետոյ փաստագրական տեսաֆիլմը պատկերեց այդ ամէնը, 1915, 1988, 1989, 1990 Սումգայիթ, Կիրովաբադ, Բաքու եւ այսօր 2014՝ Քեսաբ:

Միջոցառման յաջորդ բաժնում հրաւիրւեց օրւայ բանախօս, «Ալիք» օրաթերթի գլխաւոր խմբագիր Դերենիկ Մելիքեանը: Նա իր ելոյթի ընթացքում անդրադառնալով Քեսաբի իրավիճակին ասաց. «Անցնող 20 օրերի ընթացքում հայաշխարհի պահանջատիրական պայքարի երկարատեւ ու ընդարձակ ճակատում նոր խրամատ յայտնւեց՝ Քեսաբ եւ քեսաբահայութիւն:

Սրանից 7-ը տարի առաջ հայոց պահանջատիրական պայքարի վերջին կռւան-խրամատներից էր հանդիսացել «Բոլորս Հրանտ Դինք ենք» ցասումի ու բողոքի հուժկու ձայնը, որին ահա միացւել է «Բոլորս քեսաբահայութեան կողքին ենք» արդարատենչ, սակայն եւ խլացնող կոչը, ուղղւած այսպէս ասած՝ քաղաքակիրթ աշխարհին»:

Բանախօսը տարբեր օրինակներով անդրադարձաւ նաեւ Հայաստանի եւ Սփիւռքի, մի խօսքով՝ հայաշխարհի կողմից սիրիահայութեանը օժանդակութիւն ցուցաբերելու գործօններին՝ միջազգային ատեաններում իրականացւած քայլերին: Բանախօսը հետեւեալ տողերով ամփոփեց իր ելոյթը. «Հայոց Ցեղասպանութեան ու հայոց պահանջատիրութեան 100-րդ տարելիցի կարեւոր հանգրւանի շեմին ենք կանգնած: Ցեղասպան Թուրքիան բազմաթիւ անգամներ ցաւ է պատճառել մեզ՝ ազգովի: ... Բայց եկէք խոստովանենք, որ այդ վճարւած գինը եւ ցաւը նաեւ ու մանաւանդ կոփել ու ամրացրել են մեր երթը՝ յօգուտ աւելի միասնակամանալու, յօգուտ մեր դարաւոր պայքարի յաղթական աւարտի հաւատոյ հանգանակի:

Վերջին ցաւն ու գինը, ահաւասիկ, հանդիսացել է Քեսաբն ու քեսաբահայութեան աննախանձելի իրավիճակը:

Նոյն միասնական ոգին, նոյն համազգային ու համահայկական կեցւածքն ու յարատեւ պահանջատիրութիւնը լինելու են հայ ժողովրդի զօրեղ կռւաններն ու զէնքերը՝ նախ Թուրքիայի ցեղասպան իշխանաւորներին, ապաեւ՝ շահամոլ ու անտարբեր աշխարհին պարտադրելու, որպէսզի հաշւի նստեն հայութեան անբեկանելի իրաւունքների ու չլուծւած դատի հետ»:

Միջոցառմանը հրաւիրւեց՝ արտայայտւելու Իրանում Հայաստանի արտակարգ եւ լիազօր դեսպան Գրիգոր Առաքելեանը եւ Հայաստանի կառավարութեան ու հանր. նախագահի կողմից միջազգային ատեաններում, ինչպէս՝ Հաագայում (Լահէ) ունեցած արտայայտութիւններին եւ աւելացրեց, որ Հ.Հ. նախագահը Քեսաբի դէպքը ազգային փոքրամասնութիւններին պաշտպանելու 21-րդ դարի մեխանիզմներին նետւած լրջագոյն մարտահրաւէրը համարելով՝ նշում է, որ դա պէտք է սթափութեան ազդակ լինի բոլորի համար:

Միջոցառմանը օրւայ առթիւ արտայայտւեց Թ. Հ. թեմի առաջնորդ Տ. Սեպուհ արք. Սարգսեանը, նշելով, որ միջոցառման ընթացքում Արամ Ա Վեհափառ Հայրապետը հեռախօսել եւ ողջունել է կազմակերպւած հանդիսութիւնը: Թեմակալ առաջնորդը իր արտայայտութիւնների ընթացքում խօսելով քեսաբահայութեան ցայսօր ունեցած պահանջատիրական ոգու մասին՝ աւելացրեց. «Գաղափարապաշտ մարդու եւ ժողովրդի համար տկարութեան պահերը կարճ հանգրւաններ են եւ իր առաքելութեանն ու կոչումին կառչած ժողովուրդը կը կարողանայ վերստին տիրանալ իր իրաւունքին:

Երեկոյի գեղարւեստական բաժնում ասմունքեց Սիփան Մկրտումեանը, երգով ելոյթ ունեցաւ Էդւին Սուլթանեանը եւ սասունցիական խրոխտ պարերով հանդէս եկաւ միութեան պարախումբը:

Միջոցառմանը ներկայ էին՝ Իսլ. խորհրդարանում Թեհրանի եւ հիւսիսային իրանահայութեան պատգամաւոր դոկտ. Կարէն Խանլարեանը, ԻԻՀ-ում ՀՀ դեսպանատան հիւպատոսական ու դիւանագիտական անձնակազմը, Հ.Յ.Դ. Բիւրոյի անդամ ճրտգ. Վիգէն Բաղումեանը, Թ.Հ.Թ. Պատգամաւորական ժողովի, Թեմական խորհրդի անդամները, քահանայից դասը, «Ալիք» հաստատութեան, ազգային մարմինների եւ միութիւնների ներկայացուցիչներ: