Աղբիւր՝ www.armenianorthodoxchurch.org
Ուրբաթ՝ 14 փետրւար 2014-ի առաւօտեան, Վեհափառ Հայրապետն ընդունեց հինգ հոգուց բաղկացած մի պատւիրակութիւն, որ ներկայացնում էր Զւիցերիոյ, Անգլիոյ, Հոլանդայի, Գերմանիոյ եւ Շւէդի մէջ հաստատւած միջազգային ոչ-կառավարական կազմակերպութիւնների ներկայացուցիչները: Անցնող ամիսների ընթացքում յիշեալ կազմակերպութիւնների աշխատանքի թիրախը դարձել էր ընդհանրապէս Սիրիոյ հարցն ու յատկապէս քրիստոնեայ համայնքների ապագան: Այս ուղղութեամբ, նրանք հանդիպումներ էին ունեցել Եւրոպայի պետական պատասխանատուների հետ:
Վեհափառ Հայրապետին այցելութեան նպատակն էր Եկեղեցիների համաշխարհային խորհրդի կենտրոնում տեղի ունեցած «Ժնեւ-2» ժողովի գծով, որտեղ Վեհափառ Հայրապետը կարեւոր ներդրում էր կատարել եւ ընդհանրապէս սիրիական հարցի տագնապի խաղաղ լուծման շուրջ Վեհափառ Հայրապետի տեսակէտներն ունենալ:
Առաջին հերթին, Վեհափառ Հայրապետը վերաքաղ կատարեց ինը կէտերից բաղկացած Ժնեւի ժողովին իր փոխանցած պատկերացումի, յատկապէս շեշտելով այն բաժինները, որոնք առնչւած էին քրիստոնեայ համայնքներին: Ապա, Վեհափառ Հայրապետը կարեւորութեամբ ընդգծեց Սիրիան դէպի խաղաղութիւն առաջնորդող մի գործընթացքի հաստատումը, մասնակցութեամբ կառավարութեան, ընդդիմադրութեան եւ բոլոր համայնքների ներկայացուցիչների: «Նման մի գործընթացք ենթադրում է թէ՛ Արաբական Լիկայի եւ թէ՛ ՄԱԿ-ի ամբողջական զօրակցութիւնը»,- ասաց Վեհափառ Հայրապետը:
Իր եզրափակիչ խօսքի մէջ նաեւ Վեհափառը շեշտեց երկու կէտեր.- ա) Քրիստոնեայ համայնքները անանջատելի մասն են սիրիական ընկերութեան եւ նրանց ներկայութիւնը խոր արմատներ ունի պատմութեան մէջ: բ) Քրիստոնեայ-իսլամ գոյակցութիւնը պէտք է հիմքը ծառայի Սիրիոյ նկատմամբ առնւելիք որեւէ քայլի՝ այս շրջանակում միշտ յարգելով քրիստոնեաների իրաւունքներն ու պարտաւորութիւնները, որպէս համահաւասար քաղաքացիներ: