Աղբիւր՝ www.armenianorthodoxchurch.org
«ՄԻՋԻՆ ԱՐԵՒԵԼՔՈՒՄ ՔՐԻՍՏՈՆԷՈՒԹԻՒՆԸ ՊԷՏՔ Է ՀԱՒԱՏԱՐԻՄ ՄՆԱՅ ԻՐ ԱՆՑԵԱԼԻ, ՆԵՐԿԱՅԻ ԵՒ ԱՊԱԳԱՅԻ ՆԿԱՏՄԱՄԲ»
Ժնեւի Եկեղեցիների Համաշխարհային Խորհրդի Կենտրոնատեղում մի քանի օր առաջ գումարւած համագումարին, որ յատկացւել էր «Ժնեւ-2»-ին Եկեղեցիների Համաշխարհային Խորհրդի բերելիք նպաստին, Միջին Արեւելքից քրիստոնէութեան արտագաղթի հարցը լայնօրէն քննարկւեց: Այս հարցին անդրադառնալով, Ն.Ս.Օ.Տ.Տ. Արամ Ա Կաթողիկոսն իր լուրջ մտահոգութիւնը յայտնեց Միջին Արեւելքում քրիստոնէական ներկայութեան հետզհետէ նւազումի նկատմամբ. «Հսկայ քրիստոնէական գաղութները Միջին Արեւելքում սկսել են վերջին տասնամեակներում կորցնել իրենց քանակային թէ որակային հզօրութիւնը: Մի պահ դիտէք երէկի ու այսօրւայ քրիստոնէական ներկայութիւնը Երուսաղէմում, Իրաքում, Լիբանանում եւ Սիրիայում: Քրիստոնէութեան ծննդավայրը դարձել Միջին Արեւելքն այսօր պարպւում է իր քրիստոնէական ներկայութիւնից: Սիրիան, պատմական բառով Անտիոքը, որ եղել է հզօր կենտրոններից մէկը քրիստոնէութեան, վերջին տարիներում տագնապի բերումով սկսել է կորցնել իր քրիստոնեայ բնակչութեան մէկ կարեւոր մասը: Խորապէս մտահոգիչ է այս երեւոյթը: Քրիստոնէական ներկայութիւնը շրջանում կենսական է թէ արեւմուտքի եւ թէ իսլամութեան համար: Քրիստոնէական պատմութիւնը Միջին Արեւելքում եղել է տագնապներով լեցուն. սակայն եկեղեցիները կառչած են մնացել իրենց իրաւունքներին, աւանդութիւններին ու արժէքներին: Նոյնը պէտք է լինի այսօր»:
Շարունակելով իր խօսքը Վեհափառ Հայրապետն ասաց. «Մենք գնահատում ենք Արեւմտեան մի շարք երկրների աջակցութիւնը քրիստոնեայ գաղթականները ժամանակաւորապէս ընդունելու։ Սակայն զգուշ պէտք է լինել եւ պէտք չէ քաջալերել քրիստոնեաների արտագաղթը Միջին Արեւելքից: Այս է շրջանի բոլոր եկեղեցիների յստակ քաղաքականութիւնը: Մենք դէմ ենք արտագաղթին, որքան էլ դժւար լինեն մեզ շրջապատող պայմանները»:
Վեհափառ Հայրապետի մտահոգութեան նոյն ուժգնութեամբ արձագանգեցին Միջին Արեւելքից ներկայ պատրիարքներն ու բարձրաստիճան հոգեւորականները։ Նրանք եւս իրենց կարգին յիշեցրին քրիստոնէութիւնը շրջանում ամուր պահելու հրամայական անհրաժեշտութիւնը եւ կոչ ուղղեցին արեւմտեան պետութիւններին՝ օգտակար լինելու այս ուղղութեամբ: