Աղբիւր՝ www.armenianorthodoxchurch.org
Երկուշաբթի՝ 29 սեպտեմբեր 2014-ի երեկոյեան, Ն.Ս.Օ.Տ.Տ. Արամ Ա Կաթողիկոսն ընդառաջելով Աթէնքի համալսարանի տնօրէնութեան հրաւէրին, մի դասախօսութիւն ներկայացրեց Միջին արեւելքի մէջ քրիստոնէութեան ներկայութեան նիւթի շուրջ: Դասախօսութեանը ներկայ էին վարչապետի եւ Յունաստանի Եկեղեցու պետի ներկայացուցիչները, ինչպէս նաեւ քաղաքական, ակադեմական ու պետական շրջանակներ ներկայացնող բարձրաստիճան պատասխանատուներ եւ հայ համայնքի ներկայացուցիչներ:
Համալսարանի նախագահը խօսք առնելով ներկայացրեց Վեհափառ Հայրապետի կենսագրութիւնը: Նա նշեց բոլոր համալսարանները եւ վկայականները (M.Div. Մագիստրոս աստւածաբանութեան, S.T.M. Ծայրագոյն մագիստրոս Մերձաւոր արեւելքի պատմութեան եւ Ph.D. Դոկտոր փիլիսոբայութեան), որոնք Նորին Սրբութիւնն ստացել է:
Ապա, համալսարանի տնօրէնը ներկայացնելով Արամ Ա Կաթողիկոսի գործունէութիւնը, յատկապէս աստւածաբանական, միջ-եկեղեցական ու միջ-կրօնական մարզերում, մէջբերումներ կատարեց Վեհափառ Հայրապետի աշխատասիրութիւններից եւ նրան ներկայացրեց որպէս ներկայ ժամանակների աչքառու աստւածաբան, միջ-եկեղեցական ու միջ-կրօնական երկխօսութեան ռահվիրայ եւ միջազգային առումով կրօնական դէմք: Մեկնելով այս իրողութիւնից տնօրէնն ասաց, որ համալսարանի վերին իշխանութիւնը որոշել է Նորին Սրբութեանը շնորհել Աթէնքի համալսարանի պատւոյ դոկտորայի տիտղոս, եզակի մի տիտղոս, որ բացառիկ կարողութիւնների տէր անձերի է շնորհւում, շեշտեց տնօրէնը: Արտասանւած խօսքերից յետոյ կարդացւեց պատւոյ դոկտորայի տւչութեան պաշտօնագիրը:
Վերջապէս, Արամ Ա Կաթողիկոսը հրաւիրւեց դասախօսութիւն տալու: Ընդհանուր գծերով ներկայացնելուց յետոյ Միջին արեւելքի ներկայ տագնապը, Նորին Սրբութիւնը շեշտեց, որ Միջին արեւելքի քրիստոնեայ համայնքները պէտք չէ դիտողի դերի մէջ լինեն, այլ պէտք է մասնակից դառնան այն բոլոր աշխատանքներին, որոնց նպատակը ժողովրդավարական կարգերի հաստատումն է: Վեհափառ Հայրապետը նաեւ ասաց, որ քրիստոնէութիւնը Միջին արեւելքում մերժում է փոքրամասնութիւն լինելու մօտեցումը, այլ պահանջում է իր իրաւունքները որպէս համահաւասար քաղաքացիներ: Ի վերջոյ, Նորին Սրբութիւնը կարեւորութեամբ ընդգծեց երկխօսութիւնն ու գործակցութիւնը միաստւածեան կրօնների միջեւ՝ նկատի ունենալով կրօնի կարեւոր դերը ընկերութեան կեանքում: Իր խօսքի երկրորդ բաժնում, նա մատնանշեց այն կէտերը, որոնք Միջին արեւելքի քրիստոնեայ եկեղեցիների համար պէտք է առաջնահերթութիւն ստանան՝ քրիստոնէական միութեան ամրապնդում, կրօնական դաստիարակութեան վերակազմակերպում, եկեղեցու ժողովրդանւէր ծառայութեան աշխուժացում, միջ-եկեղեցական գործակցութեան ամրապնդում եւ սփիւռքի հետ կապերի սերտացում: Վեհափառ Հայրապետը նաեւ անդրադարձաւ Յունաստանի դերակատարութեանը, յարաբերաբար Միջին արեւելքի եւ յատկապէս շրջանի քրիստոնեայ համայնքների: Նա ասաց, որ Յունաստանի ու Միջին արեւելքի միջեւ գոյութիւն ունեցող պատմական կապերը եւ օրթոդոքս եկեղեցիների ներկայութիւնը Միջին արեւելքում, պէտք է մղեն Յունաստանին եւ Յունաստանի Եկեղեցին՝ աւելի լայն ու յանձնառու դերակատարութիւն ստանձնելու շրջանում:
Դասախօսութիւնից յետոյ ներկաները շնորհաւորեցին Նորին Սրբութեանը: Այս առիթով, Վեհափառ Հայրապետը հարցազրոյց ունեցաւ Յունաստանի պետական հեռատեսիլի հետ: