Աղբիւր՝ www.asbarez.com

Թուրք գրող Այշէ Գուլին ներողութիւն է խնդրել թրքական պատկերասփիւռի մի կայանից իր կատարած այն արտայայտութեան համար, որով վիրաւորել էր հայութեանը՝ Հայոց ցեղասպանութեան կապակցութեամբ: Արդարեւ, «Սի.Էն.Էն. թուրք» կայանից մի հարցազրոյցի ընթացքում, նա ասել էր, թէ հայերի ջարդը կարելի չէ Ցեղասպանութիւն նկատել, այլ տեղի ունեցածը պարզապէս տեղահանութիւն էր: «Այնպէս չէր, որ հայերը ոչինչ չէին արել, իսկ մենք նրանց ջարդեցինք, ինչպէս գերմանացիները՝ հրեաներին»,- ասել էր նա:

Այս արտայայտութեան համար Գուլին արժանացաւ խիստ քննադատութիւնների: Նրա դէմ նաեւ ձեռնարկւեց ստորագրահաւաք:

Գուլին ընդունել է, որ սխալ արտայայտութիւններ է հնչեցրել կայանից եւ ինքն իրեն մեղադրել է անյարիր շարադրանքի համար:

«Նպատակս երբեք չի եղել ասել, թէ՝ հայերն արժանի էին ջարդւելու: Ես նման խօսք չէի ասելու եւ ոչ էլ մտածում էի այդ մասին: Ինձ ճանաչողները կարող են վկայել այդ մասին»,- ասել է Գուլին՝ ըստ «Ինթերնեթհաբեր» լրատւական կայքի:

Փորձելով պարզաբանել՝ նա նաեւ ասել է, թէ իր նպատակն եղած էր Հիթլերի կազմակերպած ջարդերի եւ Օսմանեան կայսրութեան մէջ հայերի դէմ պատահածների միջեւ տարբերութիւն դնել: Ըստ նրա՝ հայերն ու թուրքերը պատերազմի մէջ էին եւ իրար սպանում էին: Գուլին դարձեալ մերժել է ջարդերը Ցեղասպանութիւն անւանել, սակայն միաժամանակ շեշտել է, թէ «ամօթ ու ցաւ է ապրում, որ թուրքերը մեղաւոր էին»:

«Սխալ հասկացւած նախադասութեանս համար, բոլորի՛ց, Թուրքիայում բնակւող հայերից ներողութիւն եմ խնդրում՝ ի սրտէ»,- եզրափակել է նա: