Աղբիւր՝ www.yerkir.am

Թուրքիայում արգելվել է քրդական Roza ամսագրի վաճառքը: Թուրքական Evrensel.net լրատվակայքի տեղեկացմամբ՝ 2 ամիսը մեկ քրդերեն և թուրքերեն լեզուներով հրատարակվող ամսագիրն իր գործունեության 2 տարվա ընթացքում ընդամենը 10 համար է թողարկել: Թուրքական իշխանությունները դրանցից 4-ի վերաբերյալ վաճառքից հանելու որոշում են կայացրել: Արգելվել է նաև ամսագրի բաժանումը կալանավայրերին. տեղեկացնում է Ermenihaber-ը:

Roza ամսագրի դեմ նման սահմանափակումներն իշխանությունները հիմնավորում են «ահաբեկչական խմբավորման օգտին քարոզչություն» կատարելու պնդումներով: Ուշագրավ է նաև, որ ամսագրի 6-րդ համարի վաճառքն արգելվել է Հայոց ցեղասպանության թեմայով շապիկի ու հոդվածի պատճառով:

Ամսագրի գլխավոր խմբագիր Մեհմեթ Սալիհ Էրշարին, ով ամսագրի վերաբերյալ հետաքննության շրջանակներում արդեն մի անգամ ձերբակալվել ու ազատ է արձակվել, նման սահմանափակումները բնորոշել է որպես քրդերենի և քուրդ ժողովրդի դեմ կառավարության անհանդուրժողականության դրսևորում: