Աղբիւր՝ www.yerkirmedia.am

Իսրայէլի խորհրդարանում շուրջ մէկ ժամ տեւած քննարկումից յետոյ այդ երկրի խորհրդարանը 24 կողմ ձայնով հաւանութիւն տւեց կառավարութեան ներկայացուցչի առաջարկին եւ Հայոց ցեղասպանութիւնը ճանաչող ու դատապարտող բանաձեւը կրկին յետ ուղարկեց կրթութեան յանձնաժողով լրացուցիչ քննարկման համար:

Այդ որոշումն առաջացրել է դահլիճում ներկայ հայ համայնքի ներկայացուցիչների, ինչպէս նաեւ հրեայ ականաւոր գիտնականների հիասթափութիւնն ու զայրոյթը: Ելոյթ ունեցող տարբեր կուսակցութիւններ ներկայացնող բոլոր պատգամաւորները շեշտում էին, որ 1915-ին տեղի ունեցածը Ցեղասպանութիւն է, բերում էին բազում փաստարկներ այդ ձեւակերպման օգտին: Սակայն ամփոփիչ ելոյթով հանդէս եկած կառավարութեան ներկայացուցչի խօսքից յետոյ, նրանք համաձայնութիւն տւեցին հարցի քւէրակութիւնը խորհրդարանի լիագումար նիստում յետաձգելուն:

Դեռ 2015-ի յուլիսի 8-ին էր, որ Քնեսեթի կրթութեան յանձնաժողովը, քննելով Ցեղասպանութեան ճանաչման բանաձեւի նախագիծը, որոշել էր դիմել խորհրդարանին, լիագումար նիստում այն քւէարկութեան դնելու առաջարկով: Կրկին նոյն փակ շղթան է սկսւում:

Անցնող օրերի թուրք-իսրայէլական յարաբերութիւնների ջերմացման հետեւանքով պատգամաւորների եւ Քնեսեթի ղեկավարութեան վրայ ճնշումները մեծացել էին, սակայն բանաձեւի նախագծի հեղինակները, մասնաւորապէս` «Մերեց» կուսակցութեան պատգամաւոր Զահաւայ Գալոնը չէր զիջել բանաձեւն օրակարգից հանելու կամ նոյնիսկ յետաձգելու հարցում: Սակայն, դէպքերի ընթացքը ցոյց տւեց, որ ստւերային աշխատանքն իր դերը խաղաց:

Մինչ խորհրդարանի պատերից ներս ընթանում էր քննարկումը, հայութիւնը զօրակցական հանրահաւաք էր կազմակերպել խորհրդարանի առջեւ: Հաւաքի ընթացքում ելոյթներ են ունեցել հրեայ պատմաբան Եաիր Արոնը, Քնեսեթի պատգամաւորներ Եաիր Թցաբան, «Մերեց» կուսակցութիւնից Մոշեր Ռազ, արաբական խմբակցութիւնից Այման Օդեհը:

«Իսրայէլը շարունակում է մնալ անարդար երկրների շարքում»,- որոշումն այսպէս է մեկնաբանել ՀՅԴ Երուսաղէմի Հայ Դատի յանձնախմբի ատենապետ Յակոբ Սեւանը, որը եւս ներկայ է եղել քննարկմանը: