Աղբիւր՝ www.yerkirmedia.am
Սիսի կաթողիկոսարանը յետ վերադարձնելու գործով Մեծի Տանն Կիլիկիոյ կաթողիկոսութեան հարուցած դատական գործը կարող է աւարտին հասնել հինգ ամսուայ ընթացքում: Ինչպէս հաղորդում է «Արմէնպրես»-ը, Կիլիկիոյ կաթողիկոսութեան դատական հայցով Թուրքիայում զբաղւում է յայտնի փաստաբան Ջեմ Սոֆուօղլուն, ով Ստամբուլի «Ժամանակ» օրաթերթի գլխաւոր խմբագիր Արա Գոչունեանի հետ հարցազրոյցում յայտնել է, որ Թուրքիայի Սահմանադրական դատարանը հարցը յանձնել է արդարադատութեան նախարարութեան ուսումնասիրութեանը:
Սոֆուօղլուի խօսքով` Սահմանադրական դատարանը հարցի կապակցութեամբ սպասում է Արդարադաութեան նախարարութեան տեսակէտին: Քանի որ Սահմանադրական դատարանում բացուած իւրաքանչիւր դատ համարւում է պետութեան դէմ բացուած դատ, հետեւաբար բարձրագոյն դատարանն էլ պետութեան տեսակէտին վերահասու դառնալու համար հարցը փոխանցում է Արդարադատութեան նախարարութիւն: Փաստաբանի կանխատեսումներով` հինգ ամսուայ ընթացքում դատը կարող է հասնել աւարտին:
Արդադատութեան նախարարութեան եզրակացութիւնն ունենալուց յետոյ Սահմանադրական դատարանն այն կը փոխանցի Ջեմ Սոֆուօղլուին: Վերջինս երկու շաբաթուայ ընթացքում պէտք է ներկայացնի իր մօտեցումն ու արդէն պէտք է հասնի վճռի հանգրուան:
Սոֆուօղլուի կարծիքով` վճիռը կարող է արձակուել կամ այս ամառ` արդարադատութեան համակարգի տարեկան արձակուրդից անմիջապէս առաջ, կամ այդ արձակուրդին յաջորդած շրջանում` սեպտեմբերին: Փաստաբանը կարծիք է յայտնել, որ Սահմանադրական դատարանի կողմից նիւթը Արդարադատութեան նախարարութիւն ուղարկելը շատ կարեւոր է, քանի որ «դա նշանակում է, որ պետութիւնը լուրջ վերաբերմունք է ցոյց տալիս գործին եւ մասնրամասն քննարկումներ է իրականացնում»:
«Պէտք է ընդունել, որ շատ դժուար է այսպիսի դատը շահելը: Շատ ենք աշխատել: Բայց եւ այնպէս, որպէս փաստաբան` ես այս դատը բացել եմ շահելու համար»,- ասել է Սոֆուօղլուն: