Աղբիւր՝ www.alikonline.ir

Անկարայի հանրապետական գլխաւոր դատախազութիւնն «ահաբեկչական կազմակերպութեան անդամակցելու» մեղադրանքով հետաքննութիւն է սկսել Հայոց Ցեղասպանութիւնը ճանաչած թուրք յայտնի հրատարակիչ, լրագրող եւ մարդու իրաւունքների ակտիւիստ Ռագըբ Զարաքօլուի նկատմամբ: Այդ մասին, ինչպէս հաղորդում է «Արմէնպրես»-ը,- յայտնում է թուրքական «DemokratHaber» լրատւական կայքը՝ նշելով, որ նման մեղադրանք Զարաքօլուին առաջադրւել է 2010 թւականին քրդական «Roj TV» հեռուստաալիքին տւած մի հարցազրոյցի առնչութեամբ:

Զարաքօլուի նկատմամբ հետաքննութիւնն Անկարայի դատախազութեան յանձնարարութեամբ սկսւել է դատախազ Ռամազան Դինչի կողմից 2010 թւականին նրա դէմ բացւած «Սահմանադրական կարգի դէմ կատարւած յանցագործութիւնների հետաքննութեան դոսիէ» գործի շրջանակում, որով անցնում են եւս 9 լրագրողներ:

Զարաքօլուի գլխաւորած «Բելգէ» հրատարակչութիւնը հանդէս է եկել թեմայի հետ կապւած յայտարարութեամբ, որում նշել է, որ Զարաքօլուն որեւէ հարցազրոյց չի տւել յիշեալ հեռուստաալիքին, եւ որ նրա դէմ «ահաբեկչական կազմակերպութեան անդամակցելու» մեղադրանքը շինծու է:

Հրատարակչութիւնը Զարաքօլուի դէմ հետապնդումները բացատրել է այն բանով, որ վերջինս մասնակցել է Հայոց Ցեղասպանութեան 100-րդ տարելիցի կապակցութեամբ այս տարւայ ապրիլի 22-23-ին Երեւանում կազմակերպւած Համաշխարհային գիտաժողովին եւ հանդէս եկել ցեղասպանութիւնը ժխտողների դէմ քննադատութեամբ:

«Երեւանում ունեցած ելոյթից յետոյ Ռագըբ Զարաքօլուի դէմ «օրակարգ հանւեց դարակում նիրհող դոսիէներից մէկը»», - նշել է հրատարակչութիւնը:

Թուրքական կայքը յայտնում է, որ Ռագըբ Զարաքօլուի նկատմամբ նման «մեղադրանքն» առաջինը չէ: 2011 թւականի հոկտեմբերին ահաբեկչական կազմակերպութեանն օգնելու մեղադրանքով 5 ամիս ժամկէտով կալանաւորւելուց յետոյ Զարաքօլուն դատարանի որոշման համաձայն ազատ էր արձակւել: Նա կալանաւորւել էր Թուրքիայի խորհրդարանում պաշտօնապէս ներկայացւած Քրդական «Ժողովուրդների դեմոկրատական» կուսակցութեան (BDP) Քաղաքականութեան ակադեմիայի բացման ժամանակ ելոյթ ունենալու համար: