Աղբիւր՝ www.armenian.irib.ir

Գարեգին Երկրորդ Ամենայն Հայոց կաթողիկոսը Վաշինգտոնում հեռախօսային կոնֆերանսի մասնակցեց, որի ընթացքում Վեհափառը քննարկուեց միջկրօնական համագործակցութեան կարեւորութիւնը՝ ապագայ ցեղասպանութիւնները կանխելու նպատակով: Կաթողիկոսի խօսքով՝ 2015-ը յատուկ տարի է հայ ժողովրդի համար: «Ոգեկոչում ենք այս նուիրական իրադարձութիւնները՝ մեր հոգում մխիթարութիւն ունենալով, որ հարիւր տարիների պայքարը մեր ժողովրդի համար բարի արդիւնք ունեցաւ, եւ պետութիւններ, միջազգային կազմակերպութիւններ ճանաչեցին Հայոց ցեղասպանութիւնն ու դատապարտեցին»,- ասաց նա: Վեհափառը կարեւորեց Ցեղասպանութեան զոհերին սրբադասելու որոշումը, որ նահատակուեցին յանուն իրենց ինքնութեան՝ շեշտելով. «Այսօր այլեւս մեր ժողովուրդը յիշատակի աղօթք չէ, որ կազմակերպում է մեր անմեղ նահատակների համար, այլ նրանց բարեխօսութեան հայց է, բարեխօսութեան աղօթք է բարձրացնում, որպէսզի նահատակ մեր սրբերը երկնային բարձունքներից հեղեն մարդկային կեանքի վրայ մարդասիրական արդարութիւն եւ խաղաղութիւն՝ որպէս հովանաւոր սրբեր այդ արժէքների»:

Անդրադառնալով Միջին Արեւելքում տիրող իրավիճակին՝ Գարեգին Երկրորդն ընդգծեց, որ եկեղեցին դատապարտել է այնտեղ տիրող վայրագութիւններն ու հայերի դէմ գործողութիւնները: «Հայ առաքելական եկեղեցին անմիջապէս արձագանքեց՝ առաջին հերթին նիւթական աջակցութիւն եւ զօրակցութիւն ցուցաբերելով մեր ազգի զաւակներին»,- նշեց Վեհափառը:

Թուրքիայի դէմ Մեծի Տանն Կիլիկիոյ կաթողիկոսութեան դատական հայցի առնչութեամբ Վեհափառը յիշեցրեց, որ եկեղեցին բազմաթիւ կալուածքներ ունի պատմական հայրենիքում: «Սա առաջին քայլն է մեր պահանջատիրութեան քայլերի առումով»,- յայտարարեց Ամենայն Հայոց կաթողիկոսը: