Նախաձեռնութեամբ Սպահանի հայոց թեմի Հայոց Ցեղասպանութեան 100-ամեակի ոգեկոչման Կենտրոնական յանձնախմբի Համլսարանական ենթայանձնախմբի, ուրբաթ՝ ապրիլի 10-ի երեկոյեան ժամը 7:30-ին, Նոր Ջուղայի Հայ Մ. Մ. «Արարատ» միութեան սրահում իրականացւեց դասախօսական երեկոյ, որտեղ Իրանի Իսլ. Խորհրդարանում հիւսիսային իրանահայութեան պատգամաւոր դոկտ. Կարէն Խանլարեանը դասախօսական ելոյթ ունեցաւ «Մտորումներ Հայոց Ցեղասպանութեան 100-ամեակի կապակցութեամբ» նիւթի շուրջ: Դասախօսական երեկոյին ներկայ էին Սպահանի հայոց թեմի առաջնորդ Տ. Բաբգէն արք. Չարեանը, ազգային մարմինների, շրջանի Հայ Դատի յանձնախմբի, միութիւնների եւ հայոց ազգային դպրոցների ներկայացուցիչներն ու ժողովուրդ:
Ծրագրի սկզբում երեկոյի հաղորդավարութեամբ հանդէս եկաւ կազմակերպիչ ենթայանձնախմբի անդամուհի Սօսէ Պօղոսեանը, ով բարիգալստեան խօսք ուղղելով ներկաներին, անդրադարձաւ համայն հայութեան պահանջատիրութեան հարցին եւ վերապրած հայ ժողովրդի անկոտրում կամքին, կարեւորութեամբ ընդգծելով, որ Հայոց Ցեղասպանութեան 100-ամեակը համարւում է կարեւոր հանգրւան՝ «Յիշում եմ եւ պահանջում» կարգախօսով պատմական արդարութեան պայքարը շարունակելու համար:
Հաղորդավարուհին բացման խօսքի վերջում ներկայացրեց Համալսարանական ենթայանձնախմբի ապագայ ծրագրերը, որտեղ ընդգրկւած են՝ խորհրդաժողով, համայնքային դասախօսական երեկոներ եւ այլ ծանրակշիռ ծրագրեր:
Այնուհետեւ օրւայ դասախօս դոկտ. Կարէն Խանլարեանն իր նիւթը ներկայացրեց 1870-ական թւականներից մինչեւ այսօր պատմութեան էջերից վեր հանելով հայ ժողովրդի համար նշանակալի մի շարք դէպքեր՝ նպատակ ունենալով մէկ անգամ եւս շեշտելու եւ ամրագրելու, որ Հայոց Ցեղասպանութիւնը ոչ միայն առաջին գործն էր, այլեւ ինչպէս բազմաթիւ եւրոպացի պատմաբաններ են նշում՝ վերջին լուծումը:
Պրն. Խանլարեանն իր խօսքերում անդրադառնալով Մեծ Եղեռնի իրականացման դրդապատճառներին, ընդգծեց, որ դրանցից կարեւորագոյնը եղել է Հայաստանի բռնագրաւումը, ապա 1920 թւականը մեր պատմութեան մէջ կարեւոր էջ համարելով, անդրադարձ ունեցաւ յատկապէս Սեւրի դաշնագրին եւ ԱՄՆ-ի ժամանակի նախագահ Վուդրօ Վիլսոնի իրաւարար վճռին, որի միջոցով ճշտւել է հայ-թուրքական սահմանագիծը՝ նշելով նաեւ այն հանգամանքը, որ վճիռը հաստատւել է ԱՄՆ-ի պետական մեծ կնիքով եւ փաստաթղթին տրւած է ԱՄՆ-ի օրէնքի ուժը:
Դասախօսութեան աւարտին ներկաներին առիթ տրւեց իրենց յուզող հարցերի պատասխաններն ստանալ օրւայ դասախօսից եւ իրենց տեսակէտները յայտնել թեմայի շրջագծում:
Երեկոն եզարփակւեց Սպահանի հայոց թեմի առաջնորդ Տ. Բաբգէն արք. Չարեանի հայրական պատգամով, որտեղ գնահատելով եւ վերահաստատելով դասախօսի արտայայտութիւնները, 100-ամեակը հայոց պահանջատիրական երթի համար նոր սկիզբ համարեց եւ կոչ արեց՝ առաւել զգօն ու գիտակից շարունակել մեր պայքարը եւ յստակեցնել մեր արդար պահանջները:
