Աղբիւր՝ www.yerkir.am

Կառավարութեան նիստում ՀՀ ԿԳ նախարար Արմէն Աշոտեանը ներկայացրեց մի համաձայնագիր, որը պէտք է կնքուի ՀՀ կառավարութեան եւ Բենինի Հանրապետութեան կառավարութեան միջեւ՝ կրթութեան եւ գիտութեան բնագաւառներում համագործակցութեան մասին:

Ըստ համաձանագրի՝ կողմերը խրախուսում են գիտնականների, դասախօսների եւ ուսուցիչների փոխայցելութիւններ եւ վերապատրաստման դասընթացներ կրթութեան եւ գիտութեան բնագաւառներում իրենց գիտական եւ ուսումնական հաստատութիւնների փորձն ու նուաճումները միմեանց փոխանցելու նպատակով: Ինչպէս նաեւ իւրաքանչիւր կողմ միւս կողմին տարեկան կը տրամադրի բակալաւրի կամ մագիստրոսի կրթական աստիճան ստանալու համար 4 կրթաթոշակ` ուսումնառութեան լրիւ ժամկէտով:

Ընդունող կողմը կրթական ծրագրին մասնակցող անձանց կ'ապահովի կրթաթոշակով, անվճար կրթութեամբ, կրթական ծրագրով` համաձայն ազգային օրէնսդրութեամբ, ուսանողական հանրակացարանով` իւրաքանչիւր երկրում գործող ազգային օրէնսդրութեանը համապատասխան, անվճար բժշկական ծառայութիւններով:

Կողմերը պայմանաւորւում են, որ իրենց մասնակցութեամբ գործող միջազգային կազմակերպութիւններում միմեանց կ'աջակցեն կրթութեանն ու գիտութեանն առնչուող հարցերում:

Հայկական կողմը կը նպաստի Բենինում հայոց լեզուի, գրականութեան, պատմութեան եւ մշակոյթի ուսումնասիրմանը հանրակրթական հաստատութիւններում, կ'աջակցի մասնագէտների, ուսումնամեթոդական ձեռնարկների եւ դասագրքերի տրամադրմանը: