Աղբիւր՝ www.armenpress.am

Ուրուգուան աշխատում է Լեռնային Ղարաբաղի հանրապետութեան անկախութիւնը ճանաչելու ուղղութեամբ: Այս մասին Ազգային ժողովում կայացած ասուլիսի ընթացքում յայտարարեց Ուրուգուայի փոխ-նախագահ, Սենատի նախագահ Դանիլօ Աստորին, պատասխանելով հարցին` հնարաւոր է՞, որ Ուրուգուան դառնայ Լ.Ղ.Հ.-ի անկախութիւնը ճանաչած առաջին պետութիւնը:

«Իմ երկիրն աշխատում է այդ ուղղութեամբ, սակայն, ցանկանում եմ նշել, որ մեր երկրի կառավարութիւնը ցանկանում է պահպանել լաւ յարաբերութիւնները բոլոր, յատկապէս, Լեռնային Ղարաբաղի հակամարտութիւնում ներգրաւուած երկրների հետ»,- ընդգծեց Աստորին:

Հ.Հ.-ի Ազգային ժողովի նախագահի հրաւէրով` Ուրուգուայի գործող փոխ-նախագահ, օրէնսդիր մարմնի` Ընդհանուր ժողովի նախագահ Դանիլօ Աստորին դեկտեմբերի 5-ին պաշտօնական այցով ժամանել է Երեւան։ Սա ուրուգուացի մինչ այժմ ամենաբարձրաստիճան պաշտօնեայի այցն է Հայաստան։ Ուրուգուան առաջին պետութիւնն էր, որը պաշտօնապէս ճանաչեց Հայոց ցեղասպանութիւնը: