Աղբիւր՝ www.aztagdaily.com

Հայաստանի հանրապետութեան բանակի ընդհանուր հրամանատար, զօրավար-գնդապետ Իւրի Խաչատուրովի հրաւէրով Հայաստանում է գտնում Վրաստանի զինեալ ուժերի ընդհանուր հրամանատար, զօրավար Վախթանգ Քապանածէի գլխաւորած պատուիրակութիւնը:

Երկու երկրների զինեալ ուժերի ընդհանուր հրամանատարներին միջեւ տեղի ունեցած հանդիպման ընթացքում քննարկուել են պաշտպանութեան մարզում հայ-վրացական համագործակցութեան ընթացքը եւ հեռանկարները: Կողմերը բարձր են գնահատել հայ-վրացական պաշտպանական համագործակցութեան ներկայիս մակարդակը` ընդգծելով, որ դա ոչ միայն նպաստում է երկու դրացի պետութիւնների պաշտպանութեան նախարարութիւնների պաշտպանական կարողութիւնների զարգացմանը, այլ նաեւ իր ուրոյն ներդրումն է կատարում հարաւային կովկասեան կայունութեան պահպանման գործի մէջ: Հանդիպման ընթացքում գոյացել են երկկողմանի զինուորական համագործակցութիւնն ընդլայնելու ուղղութեամբ համաձայնութիւններ:

Զօրավար Քապանածէի հետ դռնփակ տեսակցել է Հայաստանի հանրապետութեան պաշտպանութեան նախարար Սէյրան Օհանեանը: Քննարկուել են անվտանգութեան եւ պաշտպանութեան մարզերում երկկողմանի համագործակցութեան առնչուող, ինչպէս նաեւ շրջանային անվտանգութեան մարզում երկուստեք հետաքրքրութիւն ներկայացնող հարցեր: Քապանածէն նշել է, որ իր երկիրը բարձր է գնահատում պաշտպանութեան մարզում Հայաստանի հետ համագործակցութիւնը` վստահ լինելով, որ գոյութիւն ունեն բոլոր նախադրեալները դա ընդլայնելու եւ աւելի արդիւնաւէտ դարձնելու համար:

Հայաստան գտնուելու ընթացքում զօրավար Քապանածէի գլխաւորած պատուիրակութիւնը նաեւ այցելելու է Հայաստանի հանրապետութեան Պաշտպանութեան նախարարութեան Վազգէն Սարգսեանի անուան զինուորական հիմնարկ եւ Ծիծեռնակաբերդի յուշահամալիր: Այս մասին տեղեկացնում է Հայաստանի հանրապետութեան Պաշտպանութեան նախարարութեան մամլոյ ծառայութիւնը: